Sheteldik ánshi qazaqtardy qazaqsha sóıleýge shaqyrady
ASTANA. 16 tamyz. QazAqparat - Ulybrıtanııadan kelgen ıtalıan ánshisi Son Paskal qazaqtardy qazaqsha sóıleýge shaqyryp júr. Onyń kezekti beıneklıpiniń tusaýkeseri keshe Almaty qalasynda ótti. Bul jaıynda «Alash aınasy» basylymy jazyp otyr.
Qazaqstandyqtarǵa ǵalamtordyń kómegimen tanylyp úlgergen ánshi Son Paskaldyń bul beınebaıany «You should seak qazaqsha», ıaǵnı «Sen qazaqsha sóıleýge tıissiń» dep atalady. Buǵan deıin qazaqtyń birneshe ánin oryndap, jergilikti jurtshylyqtyń yqylasyna bólengen ıtalıan ánshisiniń Qazaqstan jerine kelgenine jarty jyldaı ýaqyt bolypty.
«Men aǵylshyn jáne ıtalıan tilderinde sóıleımin. Biraq orys tiline qaraǵanda qazaq tilin úırený men úshin qıyn bolǵan joq. Qazaqstannyń iri qalalarynyń turǵyndary qazaq tilinde keıde menen de nashar sóıleıtin kórinedi. Sol sebepti Qazaqstannyń memlekettik tilin nasıhattap, qazaq baýyrlarǵa «Qazaq tilinde sóıleńder!» degim keledi. Klıpti túsirýdegi maqsatym da osy», - deıdi Son Paskal.
