Sheteldik 80 týroperator Astanaǵa keldi

ASTANA. QazAqparat - Elordada sheteldik jáne otandyq týroperatorlar úshin dıalog alańy quryldy, dep habarlaıdy QazAqparat Astana ákimdiginiń medıa ortalyǵyna silteme jasap.

«Astana Konvenshn bıýro» JShS uıymdastyrǵan týrǵa Qytaıdan, Irannan, sondaı-aq TMD elderinen 80 týroperator qatysty. Olar otandyq operatorlarmen qarym-qatynas ornatyp, birqatar kelisim jasasty.

«Welcome to Astana» aqparattyq týrynyń alǵashqy eki kúninde biz Astanadaǵy qonaq úılerdi, medıtsınalyq, ǵylymı, bilim berý, sporttyq jáne mádenı nysandardy araladyq. Qazaqstan astanasynyń «Báıterek», «Nur-Álem» sııaqty biregeı ǵımarattarynda bolyp qaıttyq. Týrızm salasy birlesken jumysty talap etedi. Ol qalalar, elder arasyndaǵy dostyqty nyǵaıtyp, adamdardy jaqyndastyrady», - deıdi reseılik ekskýrsovod Vera Popovıch.

«Astana Konvenshn bıýro» JShS-niń bas menedjeri Ásel Qarbaevanyń aıtýynsha, Astanada qazirgi tańda týrızm salasynyń túrli baǵyttaryn damytý sharalary qolǵa alynyp otyr.

«Bizdiń qalada oqıǵalyq týrızmdi damytýdyń zor múmkindigi bar. Bul turǵyda Astananyń áleýeti zor. Óıtkeni búgingi tańda álemniń kóptegen elderi Qazaqstannyń astanasyn beıbitshilikke bastaıtyn orta retinde tanıdy», - dep atap ótti Ásel Qarbaeva.

«Welcome to Astana» aqparattyq týry úsh kúnge sozyldy.