Shetelderge shyǵatyn týrısterdiń sany ishki týrızm aǵynynan eki ese kóp
PETROPAVL. QazAqparat - Elimizde ishki týrızm damyp kele jatqanyna qaramastan, demalý úshin áli de shet eldi tańdaıtyn týrıster sany eki ese kóp, dep habarlaıdy «QazAqparat» HAA tilshisi.
Resmı statıstıkalyq málimetterge súıensek, byltyr Qazaqstanda ornalastyrý oryndarynyń qyzmetin 4,6 mln-nan astam óz týrısterimiz paıdalanǵan, bul ótken jylmen salystyrǵanda 7 paıyzǵa artyq. El ishinde saıahattaýshylar sany 2016 jyldan beri artyp keledi jáne halyq arasynda keńinen tanymal.
«Іshki týrızm kórsetkishteriniń ósýin zańdy dep sanaımyz. Óıtkeni, bizdiń elimiz, onyń erekshe tabıǵatyn, qonaqjaılylyǵyn jáne ár óńirdiń gastronomııalyq, mádenı erekshelikterin eskersek, týrısterge san alýan demalys túrlerin usyna alady», - dep sanaıdy «Kazakh Tourism» UK» AQ Basqarma tóraǵasy Órken Bısaqaev.
Іshki týrızmdi odan ári damytý jáne halyqty óńirlerdiń týrıstik áleýeti týraly habardar etý maqsatynda «Kazakh Tourism» UK» AQ QR Mádenıet jáne sport mınıstrliginiń tapsyrysy boıynsha Qazaqstanda aqparattyq týrlar tsıklin uıymdastyrýdy josparlap otyr.
20-30-ynshy mamyr aralyǵynda Batys Qazaqstannyń 4 aımaǵynyń týroperatorlarynan quralǵan toptyń qatysýymen alǵashqy aqparattyq týr ótkizý josparlanǵan. Olar sapar barysynda Nur-Sultan, Shymkent, Almaty qalalaryna, sondaı-aq Aqmola, Almaty, Túrkistan jáne Shyǵys Qazaqstan oblystarynyń týrıstik oryndaryna barady.
«Іshki týrızmniń belsendi túrde ósýine qaramastan, shet elderge shyǵatyn týrısterdiń sany ishki týrıstik aǵynnan eki ese derlik kóp. Onyń negizgi sebepteri, tıisti usynys pen ınfraqurylymnyń joqtyǵymen qosa, aqparattyń jetispeýshiligi. Mysalǵa, eldiń batys aımaqtarynyń turǵyndary Qazaqstannyń shyǵysynda, bolmasa ońtústiginde ne bar ekenin bilmeıdi jáne kerisinshe.
Sondyqtan halyqqa elimizdiń týrıstik múmkindikteri jaıly aqparatty turaqty túrde bere otyryp, olardy el ishinde saıahattaýǵa yntalandyrý kerek. Ádette, bul jumystyń aldynǵy shebinde Qazaqstan boıynsha týrlardy jasaqtap, jarnamalap, satatyn otandyq týrıstik kompanııalar turady», - deıdi Órken Bısaqaev.
On kúndik aqparattyq týr óńirlerdegi týrıstik jáne sanatorlyq-kýrorttyq nysandardy qamtıdy. Qazaqstandyq týrıstik kompanııalardyń ónimderin elimizdiń aýmaǵy boıynsha nasıhattaıdy. Osy maqsattar úshin, týrbıznes ókilderiniń qatysýymen Býrabaıda, Shymkentte, Almatyda jáne Óskemende birneshe b2b kezdesýler ótkizý josparlanǵan.
