Qazaqstanǵa týr satý: Sheteldik saıahatshylar qyzyǵýshylyǵy 3 ese artqan

ASTANA. KAZINFORM — Qazaqstanǵa týr satatyn mamandandyrylǵan platformalar arasynda zertteý júrgizilgen.  Nátıjesi boıynsha 5 memlekettiń sheteldik onlaın-týrıstik agenttikterinde Qazaqstanǵa barýǵa arnalǵan 962 týr anyqtalǵan. Bul 2023 jylǵy kórsetkishten 3 esedeı kóp. Bul týraly «Kazakh Tourism» UK kompanııasy málim etti.

Kompanııanyń málimetinshe, saıahatshylardyń tarapynan túsken usynystyń basym kópshiligi Almaty men Almaty oblysyna tán. Astana úshinshi orynda ekeni aıtylǵan.

– Qazaqstannyń birneshe óńirin birden qamtıtyn týrlar sanynyń aıtarlyqtaı óskeni baıqalady. Olardyń sany 2023 jylmen salystyrǵanda 7 esege jýyq kóbeıdi. Bul sheteldik aýdıtorııanyń mazmundy ári uzaq marshrýttarǵa qyzyǵýshylyǵynyń artqanyn kórsetedi. Jalpy zertteý nátıjeleri Qazaqstannyń negizgi naryqtarda óziniń qatysýyn aıtarlyqtaı kúsheıtkenin kórsetedi. Osy zertteý negizinde týroperatorlar áleýetti jáne jańa damý múmkindikterin naqty baǵalaı alady, – dep atap ótti «Kazakh Tourism» UK» AQ Týrónimderdi damytý departamentiniń dırektory Marjan Traıspaeva.

Sheteldik aýdıtorııanyń qyzyǵýshylyǵyn zertteý qazaqstandyq týrıstik ónimderge degen suranys qurylymyndaǵy aıyrmashylyqtardy kórsetedi.

Eýropalyq saıahatshylar ekologııalyq-shytyrman baǵyttarǵa, etno-mádenı baǵdarlamalarǵa jáne qalalyq týrlarǵa basymdyq beredi.

QHR týrısteri transshekaralyq jáne aralas saparlarǵa joǵary qyzyǵýshylyq tanytady. Ctrip platformasynda tabylǵan týrlardyń jartysyna jýyǵy aımaqtaǵy birneshe eldi birden qamtıtyn marshrýttardan turady.

Ońtústik koreıalyq qonaqtar belsendi demalysty mádenı jáne tabıǵı oryndarmen ushtastyratyn ekologııalyq-shytyrman týrlar men aralas baǵdarlamalardy jıi tańdaıdy.

Parsy shyǵanaǵy elderiniń saıahatshylary negizinen Qazaqstandaǵy eko jáne etno - týrızm elementteri bar qalalyq týrlarǵa basa nazar aýdarady.

Eske sala keteıik, buǵan deıin sheteldik prodıýserler Almaty baýraıynda fılm túsiretinin jazǵan edik.