Shetelderde turatyn qandastarymyzǵa arnalǵan halyqaralyq óner festıvali ótedi

ASTANA. QazAqparat - 29-30 qazan aralyǵynda Astanada Qazaq gýmanıtarlyq zań ýnıversıtetiniń kontsert zalynda QR Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń uıymdastyrýymen Qazaq handyǵynyń 550 jyldyǵyna arnalǵan shetelde turatyn qandastarymyzdyń qatysýymen halyqaralyq óner festıvali ótedi, dep habarlaıdy kazaitys.kz.

Baıqaýdyń maqsaty - Qazaq handyǵynyń 550 jyldyǵyn merekeleýdiń máni men búgingi tańdaǵy tarıhı mańyzyn ashý, jastardy ulttyq qundylyqtar rýhyna sáıkes qazaqstandyq patrıotızmge, otansúıgishtikke tárbıeleý, qazaq halqynyń mádenıeti men saltyn nasıhattaý, «Máńgilik el» ulttyq ıdeıasyn, sheteldegi daryndy qazaq jastarynyń shyǵarmashylyq sheberligin nasıhattaý.

Festıval aıasynda aqyndar músháırasy, termeshiler saıysy jáne sýretshiler kórmesi uıymdastyrylady. Saıys qorytyndysy boıynsha jeńimpazdar dıplomdarmen, alǵys hattarmen jáne aqshalaı syılyqtarmen marapattalady. Baıqaý qorytyndysy boıynsha bas júlde - bireý - 200 000 teńge; І oryn - ekeý - 150 000 teńgeden; ІІ oryn - ekeý - 120 000 teńgeden; ІІІ oryn - ekeý - 80 000 teńgeden. Yntalandyrý syılyǵy - úsheý - 60 000 teńgeden.

Atalǵan sharaǵa QR Parlamenti Májilisiniń depýtattary, zııaly qaýym ókilderi, óner maıtalmandary jáne alys-jaqyn 20-dan astam shet elden qazaq dıasporasy ókilderi, mádenı ortalyqtarynyń jetekshileri jáne ónerli jastary arnaıy shaqyrylady.

Músháıra, terme jáne kórme saıystaryna jas mólsheri 20-35 jas aralyǵyndaǵy shetelde turatyn otandastarymyz qatysady.