Shetelden jumys kúshin tartýdyń jańa tártibi Qazaqstanda 2017 jyldan bastap iske qosylady - T. Dúısenova
Eske salaıyq, jalpy otyrysta «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldanǵan bolatyn.
Qujatta sheteldik jumys kúshin tartý máseleleri de retteledi. Bul maqsatta joǵary bilikti sheteldik mamandardyń erkin naryǵyn qurý jolymen kóshi-qon úderisterin utymdy retteý kózdeledi.
«Birinshiden, sheteldik jumys kúshin tartý kvotasy halyqtyń ekonomıkalyq belsendi sanynan emes, sala boıynsha qalyptastyrylatyn bolady. Nátıjesinde qaı salaǵa, qandaı bilikti sheteldik mamandardyń tartylǵanyn bilip otyramyz. Sosyn jumys berýshilerge ruqsattama berý júıesi túbegeıli qaıta qaralady. Bul rette ruqsattama berilgeni úshin bıýdjetke alymdar jınalatyn bolady, ol jumysshylardyń sanaty men salasyna baılanysty anyqtalady. Máselen, elimizge tartylǵan sheteldik jumysshynyń biliktiligi tómen bolsa, oǵan salynatyn alym da joǵary bolady», - dedi Densaýlyq saqtaý jáne áleýmettik damý mınıstri Tamara Dúısenova.
Onyń aıtýynsha, Qazaqstanǵa mamandyǵy boıynsha óz betinshe jumysqa ornalasýǵa kelgen joǵary bilikti sheteldik mamandar úsh aı merzimi ishinde ekonomıkanyń basymdyq berilgen salasynda talap etilgen mamandar tizbesi boıynsha jumys oryndaryna biliktiliginiń sáıkestiligi týraly anyqtamasy negizinde ornalasa alady. Bul sanattaǵy mamandar bilimin, jumys ótilin, is tájirıbesin jáne ózge de biliktiligin rastaıtyn parametrlerdi baǵalaıtyn baldyq júıeden ótetin bolady.
«Tutastaı alǵanda sheteldik jumys kúshin tartý, óz betinshe jumysqa ornalasý men ishki korporatıvtik aýysý tártibin ózgertý normalary 2017 jyldyń 1 qańtarynan bastap iske qosylatyny kútiledi», - dedi mınıstr.