Shetelden urlanǵan aqshany qaıtarý: Ulttyq bıýro Axmetovtiń isin mysalǵa keltirdi
ASTANA. QazAqparat - Búgin Astanada ótken xalyqaralyq konferentsııada jemqorlyq máselesi talqylandy. Shetelden urlanǵan aqshany qaıtarý jaıy da sóz boldy, dep habarlaıdy QazAqparat tilshisi.
Osy oraıda QR Memlekettik qyzmet isteri jáne sybaılas jemqorlyqqa qarsy is-qımyl agenttigi Serik Axmetov pen Talǵat Ermegııaevtiń isin mysal retinde keltirdi.
«Búginde biz sheteldegi áriptesterimizben birlesken jumysymyzdy kúsheıtip jatyrmyz. Oǵan zańsyz aktıvterdi jylystatýǵa qarsy álemdik kúres te oń yqpalyn tıgizýde. Osy baǵytta naqty nátıje de joq emes. Máselen, eks-premer Serik Axmetovtiń isi boıynsha bıýdjetten urlanǵan 360 mln teńge Birikken Arab Ámirlikterine shyǵarylǵan bolatyn. Atalǵan eldiń quziretti organdarymen birlese otyryp, biz urlanǵan aqshany anyqtap, respýblıkalyq bıýdjetke qaıtardyq» - deıdi Sybaılas jemqorlyqqa qarsy is-qımyl boıynsha ulttyq bıýronyń jetekshisi Talǵat Tatýbaev.
Osy oraıda bıýro basshysy «Astana EKSPO-2017» ulttyq kompanııanyń burynǵy basshysy Talǵat Ermegııaevtiń qylmysyn da eske aldy.
«Sol kezde Ermegııaev pen basqa da laýazymdy tulǵalar kórmege qyzmet kórsetedi degen jeleýmen Germanııadaǵy bir fırmaǵa 13 mlrd teńge aýdaryp bergen. Osylaısha, urlanǵan aqshany jeke maqsatta paıdalanýǵa qarsy barlyq sharalar qolǵa alynyp jatyr», - dep atap kórsetti bıýro basshysy.
Aıta keteıik, 2001 jyldan beri Qazaqstanda jemqorlyq úshin 10 myńnan astam adam sottaldy. Olardyń ishinde 2 eks-premer, 17 tóraǵa, mınıstrler men olardyń orynbasarlary, 15 oblys pen qala ákimderi, ulttyq kompanııalardyń 8 top-menedjeri, kúsh qurylymdarynyń 8 jetekshisi, generalıtet bar . «Áli kúnge deıin jemqor mınıstrler men ákimder shetelde tyǵylyp júr. Olardyń barlyǵy 8 mlrd dollardan astam qarjyny jymqyryp ketti. Árıne, birinshi kezekte uıymdasqan qylmystyq toptyń jetekshisi Ábilıazov pen Hrapýnovtardy atap ótken jón. Búginde olar saıası baspananyń arqasynda jazadan qutylyp ketemiz dep oılaıdy. Biraq biz olardyń jazadan qutyla almaıtynyna senimdimiz. Biz sheteldik áriptesterimizben birlese otyryp, árbir jemqordyń tıisti jazasyn beremiz, - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov Astanada ótken xalyqaralyq konferentsııada . Aldaǵy ýaqytta Jemqorlardyń múlki kópbalaly otbasylarǵa taratylýy múmkin .
