Shetelden taýar ákeletin jeke tulǵalarǵa qandaı shekteýler bar
ASTANA. KAZINFORM – Shekaradan taýarlardy ótkizgende onyń qaısysy jeke paıdalanýǵa arnalǵan bolyp esepteledi jáne oǵan qatysty qandaı shekteýler bar? Bul saýalǵa Memlekettik kirister komıteti Saýdalyq emes aınalym basqarmasynyń bas sarapshysy Qýat Qaldashev jaýap berdi.
«Eýrazııalyq ekonomıkalyq odaqtyń kedendik shekarasy arqyly jeke paıdalanýǵa arnalǵan taýarlardy ótkizý tártibi men sharttarynyń erekshelikteri Qazaqstan Respýblıkasynyn Kedendik kodeksiniń 39-taraýynda aıqyndalǵan. Keden odaǵynyń kedendik shekarasy arqyly jeke tulǵalar ótkizetin taýarlardy jeke paıdalanýǵa arnalǵan taýarlardyń belgilengen tizimi bar», - dedi Qýat Qaldashev komıtette ótken brıfıngide.
Sondaı-aq, Kirister komıtetiniń ókili taýarlardyń mólsherli kólemin atap ótti.
- Ań terisinen jasalǵan buıymdar (onyń ishinde bas kıim de bar) adam basyna 1 zattan aspaýy tıis;
- Uıaly telefon (smartfon) – bir adamǵa 2 birlik;
- planshet – bir adamǵa 2 birlik;
- portatıvti tasymaldanatyn kompıýterler (noýtbýk, netbýk) jáne olardyń kerek-jaraqtary – bir adamǵa 1 (bir) birlik;
- zergerlik buıymdar – bir adamǵa 5 zat;
- velosıped – bir adamǵa 1 dana;
- bala arbasy – bir adamǵa 1 dana;
«Keden odaǵynyń kedendik shekarasy arqyly jeke tulǵanyń ótýi nemese onyń taýarlardy ótkizý jıiligi aıyna 1 retten aspaýy tıis», - dep tolyqtyrdy sarapshy.
