Shetelden tapsyrys berýshiler úshin jańa keden erejesi shegerilýi múmkin
ASTANA. KAZINFORM — Sheteldik marketpleısterge arnalǵan jańa keden talaby 1 shildede kúshine enbeýi múmkin.
Memlekettik kirister komıteti Ádisteme departamenti Keden ádistemesi basqarmasynyń bas sarapshysy Marhabat Omarova vedomstvonyń onlaın baspasóz máslıhatynda shetelden onlaın satyp alatyn taýarlardyń keden tólemderi qalaı ózgeretinin túsindirdi. Komıtet sarapshysy jańa keden talaby Eýrazııalyq ekonomıkalyq odaqtyń sheshimderinen týyndap otyrǵanyn eske saldy.
— Biz jańa talaptar 1 shildeden bastap kúshine enetinin aıtqanbyz. Qazaqstandyqtardyń kóbi eki aptadan keıin jańa retteý tásili iske qosylady dep oılap júrgen shyǵar. Bul talap boıynsha jumys Eýrazııalyq ekonomıkalyq odaq elderinde 2020 jyldan beri júrgizilip jatyr. Eýrazııalyq úkimetaralyq keńes 2026 jyldyń 1 shildesine deıin odaqqa múshe elderdiń báriniń keden júıesi jańa talapqa saı bolsyn degen tapsyrma túsirgen. Biraq 1 shilde aqtyq kún bolmaýy múmkin. Shegeriletin de shyǵar. Naqty kúndi keıinirek habarlaımyz, — dedi memkiris ókili.
Aıta ketý kerek, áleýmettik jelide onlaın saýda tálimgerleri 1 shildeden bastap marketpleıster arqyly onlaın tapsyrys berý qıyndaıtynyn aıtyp, dabyl qaǵyp júr.
Eske salsaq, Májilis depýtaty Marhabat Jaıymbetov onlaın saýdanyń damýy elimizge ekologııalyq zalal keltirip jatyr dep másele kótergen bolatyn.
