Shetelden SQO-ǵa asyl tuqymdy sıyrlar jetkizilýde
Atap aıtqanda, Aqqaıyń aýdanyndaǵy «Sháımerdenov» sharýa qojalyǵy mal basyn 500 iri qaraǵa kóbeıtti. Sımmental tuqymdy sıyrlar «Sybaǵa» memlekettik baǵdarlamasy aıasynda Avstrııadan jetkizildi. Asyl tuqymdy mal 5 kún boıy jol júrip, endi, mine jańa orynǵa úırenip jatyr.
Sharýashylyqta ákelingen qara malǵa arnaıy qoralar salynǵan. Jem-shóbi de jetkilikti. Sımmental sıyrlardyń bir ereksheligi, durys kútim kórgen jaǵdaıda tólderi táýligine 1 kelige deıin salmaq qosady. Etti jáne sútti baǵyttaǵy bul maldyń árqaısysynyń baǵasy - 950 myń teńge.
«Sharýashylyqta qazir myńǵa jaqyn qara mal bar. Onyń 250-i buzaýlady. Qazir 1 myń basqa arnalǵan mal keshenin salyp jatyrmyz. Qazir ónimdiligi joǵary mal satyp alyp jatyrmyz. Sımmental tuqymdy sıyrlar ári etti, ári sútti keledi. Sondyqtan mundaı tuqymdy ósirgen tıimdi», - deıdi sharýashylyq basshysy Birjan Sháımerdenov.
Sheteldik sıyrlar talapqa saı 21 kún boıy karantınde bolady. Jańa orynǵa úırengenshe olarǵa erekshe kútim kórsetilip, jaǵdaı jasalady.
Joba «Sybaǵa» baǵdarlamasy boıynsha qarjylandyryldy. Bul memlekettik baǵdarlama kásipkerlerge qolaıly jaǵdaı jasap, mal basyn tıimdi arttyrýǵa múmkindik berip otyr.
«Sybaǵa» baǵdarlamasy boıynsha nesıe jeńildetilgen paıyzben beriledi. Merzimi - 15 jyl. Alǵashqy 30 aıda kásipkerler nesıeni óteýden bosatylady. Bul merzim olarǵa iri qara maldy ósirip, tólinen paıda tabýǵa beriledi. Memlekettik sýbsıdııalaýdyń nátıjesinde nesıeniń paıyzdyq mólsherlemesi nebári 4 paıyz quraıdy», - deıdi SQO boıynsha «Agrarlyq nesıe korporatsııasynyń» bólim jetekshisi Rýslan Tıýlkın.
SQO Іshki saıasat basqarmasynyń málimetinshe, mal sharýashylyǵyn damytý baǵdarlamasy aıasynda oblysqa jyl basynan 1 myńǵa jýyq qara mal ákelindi. «Peterfeld Agro» JShS Chehııadan 512 mal satyp alýdy josparlasa, onyń 160-y jaqynda jetkizildi. Maǵjan Jumabaev aýdanyndaǵy «Agro kompleks Sulýshoq» JShS - 50, Taıynsha aýdanyndaǵy «Donetskoe Nurly Jol» JShS - 60 sıyrdy Chehııadan ákelmekshi. Ýálıhanov aýdanyndaǵy «Pana» ShQ - 60, al «Aqbota» ShQ - 53 gereford tuqymdy qara maldy Reseı Federatsııasynan satyp alýdy josparlaǵan.
