Shetelden pestıtsıd pen asyl tuqymdy mal ákeletinderge salyq jeńildigi bar

NUR-SULTAN. QazAqparat - Pestıtsıd, asyl tuqymdy mal jáne tiri iri qara maldy ımporttaýshylarǵa arnalǵan salyq jeńildigi qalpyna keldi, dep habarlaıdy QazAqparat.

Qazaqstan Respýblıkasynyń 2022 jylǵy 11 shildedegi № 135-VII QR Zańymen Salyq kodeksine qosylǵan qun salyǵyn ákimshilendirýge ózgerister engizilgen. Bul týraly QR QM Memlekettik kirister komıteti málim etti.

Mundaı ózgerister Salyq kodeksiniń 427 jáne 428-baptaryna engizilip, 2022 jyldyń 1 qańtarynan bastap qoldanysqa enedi.

Túzetýlerge sáıkes, pestıtsıdter (ýly hımıkattar), asyl tuqymdy mal, qoldan uryqtandyrýǵa arnalǵan jabdyqtar jáne tiri iri qara mal ımporttaý kezinde esepke alý ádisimen qosylǵan qun salyǵy tólenetin taýarlar tizimine endi.

Túzetýler bıznes-qaýymdastyǵynyń usynysy negizinde engizilgen.

Osyǵan deıin 2021 jylǵy 20 jeltoqsandaǵy QR Zańymen atalǵan taýarlar jeńildikter tiziliminen alynyp tastalǵan bolatyn.

Sondaı-aq, ımporttaý kezinde esepke alý ádisimen qosylǵan qun salyǵy tólenetin taýarlar boıynsha talap qoıý merzimi 5 jylǵa deıin uzartyldy.

Atalǵan ózgeris 2022 jyldyń 1 shildesinen bastap qoldanysqa enedi.

Sonymen qatar, Salyq kodeksiniń 434-babynnyń 2-tarmaǵyna qosylǵan qun salyǵyn qaıtarýdy ákimshilendirý bóliginde redaktsııalyq túzetýler engizildi.

Oǵan sáıkes, «aıyrbastaýdy júzege asyrǵan kásipkerlik sýbektileri» degen sózderdi «aıyrbastaý kezinde shıkizatty eksporttaýshylar» degen sózdermen aýystyryldy jáne «shıkizat eksportynan» degen sózder alynyp tastaldy.

Bul normalar shıkizat eksportynan túsken valıýtalyq tabystyń 50%-ten kem emes bóligin ulttyq valıýtaǵa aıyrbastaǵan tulǵalar úshin qosylǵan qun salyǵynyń asyp ketken somasyn ońaılatylǵan tártipten qaıtarýǵa múmkindik beredi.

Atalǵan ózgeris 2022 jyldyń 1 shildesinen bastap qoldanysqa endi.