Shetelden myqty mamandardy ultyna qaramaı tartý — óte mańyzdy mindet — Prezıdent

ASTANA. KAZINFORM — Jasandy ıntellektini keńinen qoldanatyn ýnıversıtetterge kóbirek derbestik berýge bolady. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.

— Elimiz bilim ekonomıkasyna kóship jatyr. Sondyqtan ǵylym, bilim jáne ınnovatsııa salasyn basqarý tásilderin ózara baılanystyrý óte mańyzdy. Ǵylym salasynda áli de memlekettiń úlesi basym. Biraq bıýdjet qarjysynyń qaıtarymy áli de shamaly bolyp tur. Jańa patentter, tehnologııalar men óndirister sııaqty kózge kórinetin naqty nátıje jetkilikti emes. Innovatsııalyq saıasatty Ǵylym jáne joǵary bilim mınıstrliginiń quzyryna bergen jón. Mınıstrlik jáne Ǵylym akademııasy birlesip, ǵylymı ınstıtýttar men joǵary oqý oryndaryn úılestirý isimen belsendi túrde aınalysýy kerek. Jasandy ıntellektini keńinen qoldanatyn ýnıversıtetterge kóbirek derbestik berýge bolady. Sonymen qatar Úkimet daryndy zertteýshilerdi qoldaý úshin qosymsha sharalar qabyldaýǵa tıis. Bilikti mamandarymyzdy elge qaıtarýdyń tıimdi tásilderin oılastyryp, qoldanysqa engizý kerek. Kadr tapshylyǵyn joıý úshin kóshi-qon saıasatyn da qaıta qaraǵan jón, — dedi Qasym-Jomart Toqaev.

Prezıdenttiń aıtýynsha, shetelden elimizdi damytýǵa úles qosa alatyn myqty mamandardy ultyna qaramaı tartý — óte mańyzdy mindet. Olardyń Qazaqstanda qalýyna jaǵdaı jasaý kerek.

— Sebebi bizge bilikti mamandar óte qajet. Ásirese tehnıkalyq mamandyqtardy meńgergen óz isiniń naǵyz sheberleri kerek. Qazirgi tilmen aıtsaq, «sapasy joǵary adamı resýrstar» qajet.Óıtkeni bilikti, sanaly adamdar — ulttyq ekonomıkanyń arqaýy, el bolashaǵynyń kepili, — dedi Memleket basshysy.

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.