Shetelden kirgen eski kóliktiń jylyn jańalap tirkemek bolǵandar tergelip jatyr
ASTANA. KAZINFORM — Sotqa deıingi 23 tergeý bastalǵan. Aldyn ala esep boıynsha bıýdjetke 14,3 mlrd teńgege zalal keltirilgen. Bul týraly Qarjylyq monıtorıng agenttiginiń baspasóz qyzmeti málim etti.
Ekologııalyq qaýipsizdikti qamtamasyz etý maqsatynda memleket kólik quralynyń shyǵarylǵan jylyna baılanysty tirkeý alymdarynyń mólsherlemesin tómendetý arqyly elge jańa júk kólikteri men avtobýstardy ákelýdi yntalandyrady. Kólikterdiń kópshiligi áli de dızelmen jumys isteıdi jáne sonyń saldarynan aýanyń lastaný deńgeıi artyp keledi. Eger avtokóliktiń shyǵarylý merzimi 5 jyldan assa, onda 2 500 AEK tóleý kerek, al eger 2 jyl tolmasa, tólenetin soma 0,25 AEK-ke deıin qysqarady.
«Keıbir josyqsyz azamattar elge eski jáne qaýipti júk kólikterin, avtobýstardy jalǵan qujattar boıynsha ákelýge tyrysyp, shyǵarylǵan jylyn aýystyrady. Tek anyqtalǵan faktiler boıynsha 2022-2023 jyldary sotqa deıingi 23 tergeý bastaldy, onda aldyn ala esep boıynsha bıýdjetke 14,3 mlrd teńgege zalal keltirilgen» — delingen habarlamada.
Málim bolǵandaı, mamandandyrylǵan HQKO-nyń 59 laýazymdy tulǵasy men memlekettik organdardyń qyzmetkerleriniń qatystylyǵy tekserilip jatyr.
«Kólik quraldaryn zańsyz bastapqy tirkeýdiń negizgi shemalary anyqtaldy. Alaıaqtyq shemalardy uıymdastyrýshylar arnaıy HQKO-ǵa bastapqy alymnyń eń tómengi mólsherlemesin tóleý maqsatynda shyǵarylǵan kúni ózgertilgen jalǵan túbirtekterdi usyna otyryp, avtokólikti esepke qoıýdy júzege asyrǵan. Keıbir jaǵdaıda tirkeý (2016 jyl buryn) Egov portaly arqyly onlaın rejıminde, jalǵan qujattardy paıdalana otyryp, resmı dılerden satyp alynǵan jáne jańa KQ retinde alymdardy tóleý arqyly júrgizilgen, – delingen QMA habarlamasynda.
Halyqaralyq avtomobıl tasymaldaýshysynyń kýáligi berilgen faktiler bolǵan. Ondaı jaǵdaıda bastapqy esepke qoıý alymdy tólemeı júrgiziledi. Keıbir jaǵdaılarda tirkeý kontrabandalyq jolmen ákelingen kólik quraldaryna qujattardyń barlyq paketin qoldan jasaýmen júzege asyryldy.
QMA júrgizgen taldaý kólik quraldaryn alǵashqy tirkeýdi Arnaıy HQKO qyzmetkerleri ıntegratsııalanǵan aqparattyq júıege avto sanaty týraly dáıeksiz derekterdi «qoldan» engizý arqyly jasalǵanyn kórsetti. Avtokólik quraldaryn búkil el aýmaǵynda odan ári zańsyz alaıaqtyq shemalar arqyly tirkeýdi boldyrmaý maqsatynda Agenttik aqparattyq júıelerdi aınalyp ótip, derekterdi «qoldan» engizý múmkindigin boldyrmaý jóninde sharalar qabyldady. «Azamattarǵa arnalǵan úkimet» KEAQ-men birlesip, Memlekettik korporatsııa qyzmetiniń Qaǵıdalaryna zańnamalyq deńgeıde tıisti ózgerister men tolyqtyrýlar engizý boıynsha jumys júrgizilip jatyr.
