Shetelden kóship kelgen qandastarymyzǵa baspana berilip, 6 aıda azamattyǵyn alady
ASTANA. QazAqparat - Shetelden kóship kelgen qandastarymyz azamattyqty alty aıdyń ishinde alatyn bolady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Densaýlyq saqtaý jáne áleýmettik damý mınıstrliginiń Eńbek jáne mıgratsııa komıtetiniń tóraǵasy Aslan Qarjaýbaev aıtty.
Onyń málimetinshe, 2012 jyly kvota berý toqtatylǵaly, Qazaqstanǵa kóship keletin qazaqtardyń sany kúrt azaıǵan.
«Osy ýaqytqa deıin oralmandardyń kóship kelý kvotasy toqtatylǵan bolatyn. Azamattyq alý quqyǵy da 4 jylǵa uzartylǵan edi. Kvota toqtaǵan 2012 jylǵy statıstıka boıynsha, sol jyly 39 myń aǵaıyn kóship keldi. Al 2013 jyly 35 myń qandasymyz tarıhı otanyna at basyn tiredi. Bıylǵy jarty jylda 7 myń adam kóship kelgen», - dedi A.Qarjaýbaev.
Onyń aıtýynsha, "Úkimettiń qaraýyndaǵy kóshi-qon zańyna osy máseleler týraly biraz ózgerister kirgizildi".
«Zańǵa sáıkes, aǵaıyndar Qazaqstan aýmaǵynyń qaı óńirine kelse de óz erki. Olar elimizge kelisimen «oralman» mártebesin alady. Turaqty turýǵa ruqsat alý úshin tólem qabiletin rastamaıtyn bolady. Úsh aıdyń ishinde turaqty tirkelýge ruqsat alysymen azamattyqqa ótinish bere alady. Ol da shamamen úsh aı kóleminde bitedi. Osylaısha, ár oralman jarty jyldyń ishinde Qazaqstan azamaty atanýǵa múmkindik bar», - dedi A. Qarjaýbaev.
Komıtet tóraǵasynyń málimetinshe, qandastarymyz úshin materıaldyq jaǵdaı da jasalmaq. Baspana máselesi de sheshimin tabatyn boldy.
«Úkimet belgilegen mekenderge kóship barǵan aǵaıyndarǵa jol shyǵyndary tólenedi. Mindetti túrde qyzmettik pátermen de qamtamasyz etiledi. Bul qyzmettik páterdi olar 5 jyldan soń menshigine alýǵa quqyly. Endi osyndaı jaǵdaılar jasalyp otyrǵanda shetelden keletin qandastarymyzdyń sany artady dep oılaımyn. Shetelden keletin qazaqtar úshin Qazaqstannyń esigi árdaıym ashyq. Keıbir azamattardyń jańsaq aqparat taratyp «shetel qazaqtaryna Qazaqstan tosqaýyl qoıdy» degen sóz durys emes. Osyny árbir qazaq bile júrgeni jón. Shetelden qazaq osy ýaqytqa deıin kóship keldi. Aldaǵy ýaqytta da kóship kele beredi», - dedi A.Qarjaýbaev.
