Shetelden kóship keletin qandastardyń qujatyn rásimdeýge bir tereze qaǵıdaty engiziledi

NUR-SULTAN. QazAqparat - Nursultan qalasynda «Otandastar qory» kommertsııalyq emes aktsıonerlik qoǵamy janynan qurylǵan Qoǵamdyq komıssııanyń kezekti otyrysy ótkizilip, onda repatrıatsııa protsesterin retteý máseleleri qaraldy, dep habarlaıdy QazAqparat.

Sondaı-aq, QR Syrtqy ister mınıstrliginiń sheteldegi qazaqtardy qoldaý jónindegi sharalar týraly aqparaty men Otandastar Qorynyń 2019 jylǵy jumys qorytyndysy tyńdaldy.

«Otandastar qorynyń» vıtse-prezıdenti Maǵaýııa Sarbasov «Sheteldegi qazaqtardy jáne repatrıatsııany qoldaý baǵytynda iske asyrylyp jatqan jobalardyń biri - álem boıynsha jumys isteıtin, barlyq mádenı-iskerlik ortalyqtardy (qazirgi kezde álem boıynsha 250-den astam) biriktiretin, «Qazaq úıi» jobasyn atap ótti. «Qazaq úıi» – úkimettik emes, saıasattan tys jáne kommertsııalyq emes joba jáne 4 baǵytta qyzmet atqarady, olar: «Abaı» mádenı ortalyǵy, «Atameken» iskerlik úıi, «Jas Qazaq» jastar klýby jáne «Atajurt» sheteldik qazaq tildi buqaralyq aqparat quraldary qaýymdastyǵy.

Sheteldegi qandastarymyzǵa qoldaý kórsetý maqsatynda qurylǵan «Otandastar qorynyń» bastamasymen elimizge kóship keletin syrttaǵy​ qazaqtardyń qujattaryn, memleketten beriletin kómekterdi rásimdeıtin bir tereze qaǵıdaty engizilmek.

Pılottyq joba Mońǵolııadaǵy Qazaqstan elshiliginde júzege asqaly otyr. Osy memlekettegi qandastarymyzdyń barlyq qujattary elshiligimiz arqyly rettelip, atamekenge kelý úrdisi jeńildetilmek. Bul joba birtindep, barlyq álemdegi qazaqtar turatyn shetelderde qolǵa alynady. Osylaısha, «Otandastar qory» sońǵy jyldary saıabyrsyǵan kóshti qaıta jandandyrýǵa yqpal etpek.