Shetelden kólik ákelýmen aınalysatyn qylmystyq shemalarǵa polıtseılerdiń de qatysy bar

ASTANA. QazAqparat - Sheteldik kólikterdi ákelýmen jáne ony esepke qoıýmen aınalysatyn qylmystyq shemalar paıda boldy. Oǵan polıtsııa qyzmetkerleriniń de qatysy bar. Qasym-Jomart Toqaev Іshki ister mınıstrliginiń alqa májilisinde osylaı dedi, dep habarlaıdy QazAqparat.

«El aýmaǵyna retsiz ákelingen sheteldik kólikter de joldaǵy jaǵdaıdy ýshyqtyryp jiberdi. Olar tirkeýsiz júrdi. Mundaı kólikterdi tizgindegen júrgizýshiler jol júrý erejesin óreskel buzdy jáne kóbine jazasyz qaldy. Qazir meniń tapsyrmam boıynsha bul kólikterdiń máselesin quqyqtyq turǵyda retteý úshin zańdastyrý jumystary júrgizilip jatyr. Ýákiletti memlekettik organdardyń ústirt sheshimi osyndaı kólikterdiń elge jappaı ákelinýine sebepshi boldy. Endi jiberilgen olqylyqtardy túzeýge májbúr bolyp otyrmyz. Onyń ishinde Іshki ister mınıstrliginiń de qatelikteri bar. Budan bólek, sheteldik kólikterdi ákelýmen jáne ony esepke qoıýmen aınalysatyn qylmystyq shemalar paıda boldy. Oǵan polıtsııa qyzmetkerleriniń de qatysy bar. Ádiletti ári quqyqtyq memlekette búkil quqyq qorǵaý júıesiniń atyna kir keltiretin mundaı zańsyzdyqtarǵa jol berilmeýi kerek. Sondyqtan quqyq qorǵaý organdary osy saladaǵy mamandarmen jáne azamattyq belsendilermen birlesip, atalǵan máselemen jan-jaqty aınalysýy kerek», - deıdi ol.