Shetelden ınvestıtsııa tartý jónindegi arnaıy organ qurý múmkindigi joqqa shyǵarylmaıdy - Elbasy
ASTANA. QazAqparat - Shetelden ınvestıtsııa tartý jónindegi arnaıy organ qurý múmkindigi joqqa shyǵarylmaıdy. Aqordada ótken Úkimettiń keńeıtilgen otyrysynda QR Prezıdenti Nursultan Nazarbaev osylaı málimdedi.
«Ekonomıkany ártaraptandyrý - bizdiń orta jáne uzaq merzimdik perspektıvadaǵy basty mindetimiz. Osy arqyly makroekonomıkalyq turaqtylyq pen ornyqty ósim saqtalady. Indýstrııalandyrýdyń maqsaty shashyrańqy jobalardy jınaý emes. Ókinishke qaraı, bizdegi birinshi besjyldyqta solaı bul da kórinis taýyp qaldy. Kerisinshe, ındýstrııalandyrýdyń maqsaty - qýatty óńdeýshi ónerkásipti damytý. Sondyqtan da, Úkimette osy baǵytqa sheteldik jáne otandyq ınvestıtsııany tartýdyń naqty jospary bolýy kerek», - dedi N. Nazarbaev.
Bul rette Elbasy atalmysh baǵyttaǵy jumys ońaı emestigin, onda kúrdeli máseleler bar ekendigin atap ótti. Prezıdenttiń aıtýynsha, dál osy maqsatta áli naqty jumystar atqarylmaı jatyr.
«Bizge ne qajet? Bálkim, taǵy bir naqty organ qurýymyz kerek shyǵar, sheteldik ınvestıtsııany tartý jónindegi. Eger qajet bolsa osyǵan da baraıyq. Bireýimiz osymen shuǵyldanaıyq, soǵan jaýapty bir adam bolsyn. Bir kezderi biz ınvestorlar óz máselesin bir ǵana organ arqyly sheshetin kompanııa qurýǵa umtylǵan edik. Múmkin soǵan qaıta kelermiz», - dedi óz pikirin bildirgen Memleket basshysy.
