Shetelden aýrý mal kóp keledi – eks vıtse-mınıstr
«Sońǵy jyldary aýyl sharýashylyǵyna qyrýar qarjy bólinip keledi. Bir sýbsıdııanyń ózi on bes jylda 100 esege ósti. Buryn 3,5 mıllıard teńge bolsa, qazir sýbsıdııalardyń kólemi 300 mıllıardtan asady. Ókinishke qaraı, jemqorlyq áreketteri de az emes. Máselen, oblystyq jáne aýdandyq deńgeıde sýbsıdııalardy taratqanda sybaılas jeqorlyq jıi bolyp jatady. Ondaı faktiler barshylyq. Nesıe stavkasyn sýbsıdııalaýdy alaıyqshy, 4 myńnan astam sharýa qujat jınap júgiredi. Olardyń barlyǵy aýdanda, al jergilikti jerde bıýrokratııa ýshyǵyp tur. Odan da aýyldyq nesıe berý seriktesterine bere salǵan jeńil emes pe? 180 seriktestik qana, olar ózderi taratyp bere salady. Sharýalardy qujat jınaýmen júgirtkenshe sýbsıdııany osynda - Astanada bir ret bere salǵan durys», - dedi T.Raqymbekov.
Onyń aıtýynsha, jyl saıyn tamyz aıynda janar-jaǵarmaıdyń baǵasy qymbattap ketedi. Osy kezde ortalyq memlekettik organdar jeńildetilgen baǵamen dızeldi otyndy taýyp beredi de, oblystarǵa taratýdy tapsyrady. Alaıda operatordy oblystar ózderi tańdaıdy. «Ol operatordy qalaı tańdaıdy? Kim tańdaıdy? Ondaı «baqytqa» kim ıe bolady? Birde-bir zańnamada operatordy tańdaý erejesi jazylmaǵan. Demek, jemqorlyq qaýpi bar. Sosyn janar-jaǵarmaı kelgennen keıin aýdan ákimi sharýalardy jınap alyp, bárin jyldam satyp alýdy tapsyrady. Al ony birden alyp ketý múmkin emes. Bireýdiń saqtaý qoımasy bar, bireýde joq. Sóıtip, janar-jaǵarmaı bireýge jetedi, ekinshisine jetpeı jatady», - dep atap kórsetti T.Raqymbekov.
Mamannyń sózine qaraǵanda, shetelden asyl tuqymdy mal jetkizý salasynda da zań buzýshylyqtar barshylyq. Qazaqstanǵa aýrý maldy kóptep kirgizedi. «Aldaǵy ýaqytta bir mıllıon bas asyl tuqymdy maldy shetelden alyp kelý josparlanǵan. Ol, shamamen, 3 mıllıard dollar. Árbir basqa 225 myń teńge kóleminde sýbsıdııa beriledi. Alaıda shetelden, kóbinese, aýrý maldy ákeledi. Máselen, 2014-2015 jyldary jetkizilgen asyl tuqymdy maldyń 30-40 protsenti aýrýdan ólip qaldy. Bul - sarapshy mamandardyń qorytyndysy. Byltyr ǵana Aqtóbe oblysynda shetelden endi ǵana kelgen 300-400 maldyń bári óldi. Oǵan qyrýar qarjy bólindi ǵoı. Sýbsıdııasy bar, kedendik jeńildikter bar. Osynyń bárin baqylaýǵa alý qajet», - deıdi ol.
Aıta keteıik, osydan eki jyl buryn T.Raqymbekov QR Aýyl sharýashylyǵy vıtse-mınıstri qyzmetin atqardy.
Jemqorlyqty baqylaý toby QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń bastamasymen quryldy. Oǵan 35 adam kiredi.
