Shetelden aqsha alatyndardyń málimetin jarııalaý: Qarjy mınıstrligi túsinik berdi
Qarjy vıtse-mınıstri Erjan Birjanov sheteldik kózderden aqsha alyp otyrǵan qazaqstandyqtardyń jeke derekterin jarııalaý máselesine qatysty túsinik berdi, dep habarlaıdy QazAqparat tilshisi.
«Biz jeke adamdardyń derekterin jarııalaǵan joqpyz. Biz úshin salyq tóleýshi týraly aqparat mańyzdy. Eger salyq tóleýshi kásipkerlik qyzmetti júzege asyrsa jáne ol bizde salyq tóleýshi retinde tirkelse, salyq eseptiligin usynsa, onda 30-bapqa (Salyq kodeksi) sáıkes salyq tóleýshiler týraly derekter salyq qupııasy sanalmaıdy. Sondyqtan biz salyq tóleýshiler týraly málimetterdi olardyń jeke sáıkestendirý nómirleri (JSN) boıynsha ornalastyra alamyz», – dedi E. Birjanov Senatta tilshiler suraǵyna jaýap bere otyryp.
Vıtse-mınıstr osyndaı aqparat vedomstvolardyń saıttarynda birazdan beri jarııalanyp kele jatqanyn aıtty.
Budan buryn habarlanǵandaı, Memlekettik kirister komıteti bıylǵy birinshi jartyjyldyqta sheteldik kózderden aqsha nemese ózge de múlik alǵan tulǵalardyń tizimin jarııalady. Qujatqa ártúrli baǵytta jumys isteıtin 240 uıymnyń ataýy men azamattardyń esimi engen. Tizilimde uıymdar men jeke adamdardyń bıznes-sáıkestendirý nómirleri (BSN) jáne jeke sáıkestendirý nómirleri (JSN) kórsetilgen.
Komıtettiń habarlaýynsha, 2018 jyldan bastap Salyq kodeksine shet memleketterden, sheteldikterden, halyqaralyq jáne sheteldik uıymdardan aqsha nemese ózge de múlik alǵan tulǵalardyń memlekettik kirister organdaryna esep berýi týraly talap engizilgen.
Al 2022 jyly Salyq kodeksiniń 29-babyna ózgeris jasalyp, oǵan sáıkes memkirister komıteti óziniń ınternet-resýrsynda sheteldik kózderden aqsha nemese ózge de múlik alǵan tulǵalardyń tizilimin jarııalaı alady.
