Shetelden ákelingen 60 tonna qyzanaqtan vırýs tabylyp, keri qaıtaryldy
TÚRKІSTAN. KAZINFORM — Shekaradan qaterli azyq-túlikti ótkizbeýge Aýyl sharýashylyǵy mınıstrligi agroónerkásip keshenindegi memlekettik ınspektsııa komıteti jaýapty. Bıyl komıtet Túrkistan oblysynda osyndaı zararly 60 tonna ónimdi anyqtaǵan.
Bıyl Túrkistan oblysyndaǵy qazaq-ózbek shekarasy arqyly shet memleketterden 1 075 avtokólikke tıelgen 15 637,802 tonna qyzanaq ónimi ımporttalǵan.
Al fıtosanıtarııa talabyna (fıtosanıtarııalyq sertıfıkaty joq, tańbasy joq) saı kelmeıtin 8 kólikke tıelgen 29,522 tonna qyzanaq ónimi óz eline keri qaıtarylǵan.
Sonymen qatar, ónimniń jasyryn zarar juqtyrǵanyn anyqtaý maqsatynda shetelden ákelingen qyzanaq, baıaldy, tátti buryshtyń árbir partııasyna tıisti karantındik fıtosanıtarııa saraptamasy (PTR) jasalǵan.
Nátıjesinde Túrikmenstan Respýblıkasynan ákelingen — 56,1 tonna, Ózbekstan Respýblıkasynan — 4,2 tonna qyzanaqtan «qyzanaq jemisiniń qońyr qatparly vırýsy» tabylǵan.
Ónimderdi kirgizýge tyıym salynyp, kelgen jaǵyna qaıtaryldy.
Budan bólek, jyl basynan beri fıtosanıtarııalyq baqylaý beketterinde talapqa saı kelmeıtin 497,624 tonna karantınge jatqyzylǵan ónim keri qaıtarylǵan.
