Shetelden ákelingen kólikter mindetti tehnıkalyq baıqaýdan ótkiziledi

ASTANA. QazAqparat - Basqa memlekette tirkelgen sheteldik avtokólikter Qazaqstannyń aýmaǵyna ákelinip, 90 kúntizbelik kún asqan boıda mindetti tehnıkalyq baıqaýdan ótkizilý tıis. Atalǵan talap osy jyldyń 16 qańtarynan bastap kúshine enip otyr. Bul týraly QazAqparat Indýstrııa mınıstrligine silteme jasap habarlaıdy.

2022 jyldyń 30 jeltoqsanynda «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» QR Zańǵa qol qoıylǵan edi.

Soǵan sáıkes «Jol qozǵalysy týraly» Zańynda qarastyrylǵan 88-baptyń 1-bóligine basqa memleketterde tirkelgen avtokólik quraldary Qazaqstan Respýblıkasynyń aýmaǵyna ákelingen nemese kirgen sáttten bastap, 90 kúntizbelik kún asqan boıda mindetti tehnıkalyq baıqaýdan ótkizilýine baılanysty tolyqtyrýlar engizildi.

Osy rette elimizde jol qozǵalysyna qatysatyn avtokólik quraldarynyń mindetti tehnıkalyq baıqaýdan ýaqtyly ótkizilýin baqylaýdy ishki ister organdary júzege asyratynyn atap ótken jón.

Qazir sheteldik avtokólikterdiń mindetti tehnıkalyq baıqaýdan ótýin qamtamasyz etý boıynsha tehnıkalyq jumystar júrgizilip jatyr.