Shetelden ákelgen kólikti memlekettik tirkeý baǵasy qalaı belgilenedi

NUR-SULTAN. QazAqparat – Shetelden ákelgen kóliktiń alǵashqy tirkeý alymy nege qymbat? Bul týraly QR Qarjy mınıstrligi Memlekettik kirister komıtetiniń basqarma basshysynyń orynbasary Aınur Sartaeva túsinikteme berdi, dep habarlaıdy QazAqparat tilshisi.

Shetelden ákelingen kólikti alǵashqy tirkeý alymy nege joǵary? Onyń aqshasy qaıda túsedi? Memlekettik kirister komıteti uıymdastyrǵan beınekonferentsııa formatyndaǵy onlaın brıfıngide sala mamandaryna osyndaı saýal qoıyldy.

«Barlyq alym-salyq sııaqty memlekettik tirkeý alymy da memlekettik bıýdjettiń qazanyna túsedi. Bul alymdardyń mólsheri Salyq kodeksinde belgilengen. Onyń kólemin memlekettik kirister organdary belgilemeıdi. Óıtkeni salyq saıasaty bizdiń komıtettiń quzyryna kirmeıdi. Biz salyqty ákimshilendirý sharalaryn ǵana júrgizemiz», - degen komıtet ókili alǵashyq tirkeý alymynyń mólsheri qalaı esepteletinin túsindirdi.

«Alǵashqy memlekettik tirkeý alymy kólikti tirkegen kezde tólenedi. Tirkeý jasaǵan kezde ishki ister organdarynyń ókilderi osy tólemdi talap etedi. Baıqasańyzdar, alǵashqy tirkeý alymynyń quny kóliktiń shyǵarylǵan jyly eskirgen saıyn joǵary bola túsedi. Zaýyttan shyqqanyna 3 jyldan artyq ýaqyt ótken sheteldik kólik ákelseńiz, alǵashqy tirkeý alymy 1,4 mln teńgeden asady. Al sý jańa kólik ákelseńiz, tirkeý alymyn tólemeısiz. ıAǵnı, eski kólikterdi ákelmeý maqsatynda osylaı jasalǵan», - dedi Aınur Sartaeva.