Shetelden 7 aılyq bala tabylyp, Qazaqstanǵa qaıtaryldy
ASTANA. KAZINFORM - QR Oqý-aǵartý mınıstrligi Balalardyń quqyqtaryn qorǵaý komıteti 7 aılyq Qazaqstan azamatynyń Reseı Federatsııasynan elge oralǵanyn habarlady.
Sábı densaýlyǵyn qarap tekserý úshin balalar aýrýhanasyna jatqyzyldy. Qazirgi ýaqytta jaǵdaıy turaqty. Medıtsınalyq sharalar aıaqtalǵan soń náreste «Balalar úıi» KMM-ne jiberiledi. Balany alyp kelý protsesine ádisker-qamqorshy jáne anestezıolog-reanımatolog qatysty.
Balalardyń quqyqtaryn qorǵaý komıtetiniń naqtylaýynsha, náresteni anasy Reseı aýmaǵynda bosanyp, odan bas tartqan.
«Biz úshin árbir balanyń qandaı jaǵdaı bolmasyn, qajetti qoldaý alýy mańyzdy. Sondaı-aq, elimizdiń árbir azamatyna barynsha qamqorlyq kórsetip, qaýipsizdigin qamtamasyz etýge tyrysýdamyz. Tıisti organdar men mamandar kishkentaı náresteni elge qaıtarý úshin orasan zor jumys atqardy. Osy jaqta onyń ósip-jetilýi úshin bilikti mamandar qoldan kelgenniń bárin isteıdi», - dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
«QR Oqý-aǵartý mınıstrligi Balalardyń quqyqtaryn qorǵaý komıteti balalardyń qaýipsizdigi men ál-aýqatyn qamtamasyz ete otyryp, olardyń quqyqtary men múddelerin qorǵaý jónindegi belsendi jumysty jalǵastyrýda. Biz qajet bolǵan jaǵdaıda balalardy Otanyna qaıtarý úshin bar kúsh-jigerimizdi salamyz jáne olardyń kásibı mamandardyń qamqorlyǵynda bolýyn qamtamasyz etemiz», - delingen habarlamada.
