Sheteldegi shottar boıynsha deklaratsııa tapsyrmaǵandarǵa ákimshilik jaza qatańdaıdy - Qarjy mınıstri
ASTANA. QazAqparat - Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jeke tulǵalardyń kiristeri men múlkin deklaratsııalaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasy Memleket basshysynyń múlikti jarııa etý protsesin jeńildetý jáne quqyq qorǵaý organdary tarapynan zańsyz qýdalaýdan kepildikter qamtamasyz etý jaǵyn qaıta qaraý týraly tapsyrmasyn oryndaý úshin, sonymen birge, «100 naqty qadam» Ult josparynyń 41-qadamynyń iske asyrýǵa baǵyttalady. Bul rette jarııa etý sýbektileri úshin kepildikterdi qamtamasyz etý jaǵynan birqatar sharalar kózdeledi.
«Atap aıtqanda, birinshiden: salyq jáne banktik zańnamalaryna jarııa etilgen múlik týraly alǵan málimetterdi jáne aqparattardy berýge tyıym salynady. Ekinshiden,qylmystyq is boıynsha dáleldemeler retinde, jarııa etý barysynda alynǵan aqparatty paıdalaný múmkindigin boldyrmaý kózdeledi. Úshinshiden, jarııa etý sýbektilerin qosymsha qorǵaý jaǵynan qylmystyq jaýaptylyqty qarastyratyn naqty normalar belgilenýde, sonymen qatar jarııa etilgen múlikti tárkileýge tyıym salynady», deıdi Qarjy mınıstri Baqyt Sultanov. Onyń aıtýynsha, búgingi kúni júrgizilip jatqan aktsııany halyq úshin tartymdy, qolaıly jáne jaǵymdy etý úshin aqshany jarııa etý tetikterin jańadan qarap onda úsh jeńildetilgen optsııa usynylady. Atap aıtqanda, aqshany bank shottaryna onyń saqtalýyn qamtamasyz etetin mindettemelersiz, alymdardy tólemeı, óz qalaýymen ıelik etýge eshqandaı shekteýsiz paıdalaný múmkindigi qarastyrylady. Sonymen qatar, bank shottaryna aýdarmaı, alymdy on paıyz mólsherinde tóleı otyryp, aqshany jarııa etýdi múmkindigin engizý kózdeledi. Úshinshiden, alymdy tólemeı «Astana» halyqaralyq qarjy ortalyǵyna jarııa etilgen aqshany ınvestıtsııalaý múmkindigin berý.
Budan bólek, jarııa etýdi qarqyndy júrgizý úshin birqatar yntalandyrý sharalary usynylady. Atap aıtqanda, sheteldegi shottar boıynsha deklaratsııa tapsyrmaǵany úshin ákimshilik jazany qatańdatylady. Budan bólek, sheteldegi múlik boıynsha mindetti túrde deklaratsııa tapsyrýdyń qosymsha talaby engiziledi.
«Joǵaryda aıtylǵan sharalar jarııa etý sharttaryn qolaıly jáne tartymdy etýge jáne osy aktsııaǵa halyqtyń qatysý belsendiligin arttyrý maqsatynda múmkinshilikter jasaıtyn bolady dep kútilýde. Osy sharalardy iske asyrý úshin jarııa etý merzimin 2016 jylǵy 31 jeltoqsanǵa deıin uzartý usynylyp otyr. Bul negizinen jalpyǵa ortaq deklaratsııalaýdyń jáne «Astana» halyqaralyq qarjy ortalyǵynyń jumys isteýimen baılanysty», -dedi Qarjy mınıstri Baqyt Sultanov.
