Sheteldegi qazaqtardy qoldaıtyn memlekettik baǵdarlama ázirlenedi
«Otandastar» qorynyń vıtse-prezıdenti Maǵaýııa Sarbasovtyń aıtýynsha, arnaıy Jol kartasy men Qordy damytý jospary bekitilgen.
«Josparǵa sáıkes, sheteldegi qazaqtardy qoldaý men erikti qonys aýdarýy boıynsha memlekettik baǵdarlama ázirlenedi. Sheteldegi otandastardy memlekettik qoldaý týraly QR Zańy daıyndalady. Otandastarǵa aqparattyq qoldaý ortalyǵyń, dıalog alańdarynyń jumysy uıymdastyrylady. Shet elde qazaq tilin úıretý boıynsha oqytý ınfraqurylymy jasalady», - dedi Maǵaýııa Sarbasov astanada «Adam jáne etnıkalyq azshylyqtar quqyqtaryn qorǵaý» dóńgelek ústelinde.
Spıkerdiń aıtýynsha, qazir otandastardy qoldaý men olardy tarıhı otanǵa qaıtarý boıynsha ózge elderdiń tájirıbesi zerttelip jatyr. Maqsatty saraptamalyq zertteýler júrgizilýde. Bul jumys nátıjesinde naqty usynymdar, qorytyndy materıaldar ázirlenedi jáne Aqparat jáne qoǵamdyq damý mınıstrligine usynylady.
Óz kezeginde, QR Aqparat jáne qoǵamdyq damý mınıstrligi eldegi etnıkaaralyq qatynastardyń qalaı retteletinin túsindirdi.
«Etnıkaaralyq jáne konfessııaaralyq kelisimdi saqtaý elimiz eń mańyzdy basymdyq bolyp qala beredi. Mınıstrlik qyzmeti arqyly etnıkalyq BAQ-tarǵa qoldaý kórsetiledi. Qazaqstanda 52 etnıkalyq BAQ 12 tilde jumys isteıdi. Mınıstrlik turaqty negizde etnıkaaralyq salaǵa quqyqtyq monıtorıng júrgizedi. Ol úshin etnıkaaralyq qarym-qatynastar salasyn retteıtin zańnamalyq jáne normatıvtik-quqyqtyq bazany únemi jetildirip otyramyz. 2018 jyly Qazaqstan halqy assambleıasy týraly zańǵa túzetýler engizildi, onda assambleıanyń etnomádenı birlestikterine qatysty jańa erejeler engizildi», - dedi QR Aqparat jáne qoǵamdyq damý mınıstrligi Etnıkaaralyq qatynastardy damytý departamentiniń dırektory Ǵalym Shoıkın.
