Sheteldegi qazaqtardy qoldaýǵa baǵyttalǵan memorandýmǵa qol qoıyldy

NUR-SULTAN. QazAqparat - «Otandastar qory» KEAQ prezıdenti Nurtaı Ábiqaev pen QR Mádenıet jáne sport mınıstri Arystanbek Muhamedıuly sheteldegi qazaqtardy qoldaýǵa baǵyttalǵan memorandýmǵa qol qoıdy, dep habarlaıdy QazAqparat tilshisi.

Atap aıtqanda, memorandým kúshi etnıkalyq qazaqtardy jáne shetelde turatyn otandastardy mádenıet jáne sport salasynda qoldaý maqsatynda ózara yntymaqtastyq pen áriptestik qatynasty nyǵaıtýǵa baǵyttalyp otyr.

Sondaı-aq, memorandým etnıkalyq qazaqtardy jáne shetelde turatyn otandastardy qoldaýǵa baǵyttalǵan birlesken mádenı jáne sporttyq buqaralyq is-sharalardy ótkizý boıynsha taraptar arasyndaǵy áriptestik qatynasty nyǵaıtýdy kózdeıdi.

Kelisim sheńberinde taraptar mynadaı baǵyttar boıynsha yntymaqtastyqty júzege asyrmaq:

- halyqaralyq, respýblıkalyq jáne óńirlik is-sharalardy (quryltaılar, konferentsııalar, semınarlar, sımpozıýmdar, brıfıngter, keńester, «dóńgelek ústelder» jáne t. b.) ótkizýge járdemdesý;

- sheteldik etnıkalyq qazaqtar úshin oqý-ádistemelik quraldardy ázirleý men shyǵarýdy, olardy ınternet-resýrstarda ornalastyrýdy birlesip qamtamasyz etý;

- Qazaqstan Respýblıkasynyń Ulttyq akademııalyq kitaphanasy men Qazaqstan Respýblıkasynyń Ulttyq kitaphanasy bazasynda shetelde turatyn otandastarymyz týraly kitaptardan turatyn «Otandastar» kitaphanacyn qurýdy qoldaý;

- shetelde turatyn otandastardy memlekettik shyǵarmashylyq oqý oryndarynda jáne Olımpıadalyq rezerv mektepterinde oqytý úshin kvotalar (granttar) bólý.

«Barlyǵyńyz biletindeı, byltyr Dúnıejúzilik quryltaıda Elbasy tıisti tapsyrma berip, «Otandastar» qory qurylǵan bolatyn. Qor búgingi tańda qyzý jumys júrgizip jatyr. Osyndaı memorandýmdarǵa oblys ákimdikterimen, mınıstrliktermen de qol qoıyp jatyrmyz. Qor jurtshylyqqa ortaq. Sol sebepti, sheteldegi qandastardy qoldaýǵa baǵyttalǵan sharalar legi iske asyryla beredi», - deıdi «Otandastar qory» KEAQ prezıdenti Nurtaı Ábiqaev.