Sheteldegi qazaqstandyqtardyń iskerlik múddesin quqyqtyq qorǵaý qamtamasyz etiledi - Májilis
ASTANA. QazAqparat - Búgin Parlament Májilisinde palata depýtattary «Sot tóreligine halyqaralyq qol jetkizý týraly konventsııany ratıfıkatsııalaý týraly» zań jobasyn maquldady.
Atalǵan konventsııa 1980 jyly Gaagada jasalǵan. Al qujattyń maqsaty sheteldik jáne azamattyǵy joq adamnyń sot tóreligine qol jetkizýine kepildik berý bolyp tabylady.
«Elbasy Joldaýynda sheteldegi azamattarymyzdyń, olardyń jeke basynyń, otbasynyń iskerlik múddesine quqyqtyq qorǵaýdy qamtamasyz etý tapsyrylǵan bolatyn. Atalǵan mindetti oryndaý úshin osy konventsııany qabyldaý mańyzdy», - deıdi Ádilet mınıstri Berik Imashev.
Onyń sózine qaraǵanda, konventsııaǵa sáıkes, ony qabyldaǵan elderdiń azamattaryna azamattyq jáne saýda isteri boıynsha quqyqtyq kómekter kórsetiledi, sot shyǵyndary qamtamasyz etilip, azamattardy ustaý men tıispeýshilik kepildikteri qamtylady.
«Quqyqtyq kómek kórsetý týraly suraýdy oryndaý memlekettiń egemendigine, qaýipsizdigine, qoǵamdyq tártibine nuqsan keltirý múmkindigi jaǵdaıynda memlekettik kómek kórsetýden bas tartylý quqyǵy da qamtylatyn bolady», - deıdi Ádilet mınıstri.
Toqtala ketetin jaıt, Konventsııaǵa qosylý oǵan qatysatyn 31 memleketpen, onyń ishinde Azamattyq is-júrgizý týraly konventsııaǵa múshe bolyp tabylatyn 26 memleketpen yntymaqtastyqty ornatýǵa múmkindik beredi.
Májilis maquldaǵan zań jobasy Parlament Senatyna joldanady.
