Sheteldegi qazaqstandyqtar call-ortalyqpen onlaın baılanysa alady
NUR-SULTAN. QazAqparat - Shetelde júrgen Qazaqstan azamattary endi 1414 biryńǵaı baılanys ortalyǵynyń operatorymen onlaın-aýdıojazba arqyly baılanysa alady. Bul týraly «Ulttyq aqparattyq tehnologııalar» AQ baspasóz qyzmetinen málim etti, dep habarlaıdy QazAqparat.
1414 tegin qońyraý shalý úshin paıdalanýshy egov.kz portalyna kirip, tómengi oń jaq buryshtaǵy «Vırtýaldy keńesshi» vıdjetin basý qajet. Qalqymaly terezede qulaqqap túrindegi belgige basyp, qońyraý shalý kerek. Vırtýaldy keńesshi arqyly operatormen baılanys jasaý úshin mıkrofon jáne qulaqqaptyń bolýy mindetti.
«Bizge basqa elderde júrgen azamattardan ótinishter jıi kelip túsken edi. Osyǵan oraı 1414 call-ortalyǵynyń operatorlarymen ınternet arqyly qosylý múmkindigin qarastyryp, búgin iske qostyq. Interneti bar adam 1414 keńesshisimen habarlasyp, bar suraqqa jaýap ala alady. Sondaı-aq, keńesshimen áńgimesý barysynda kólemi 20 megabaıttan aspaıtyn kez kelgen formattaǵy faıldardy tirkeý jáne jiberý múmkindigin qarastyrdyq», - dedi «UAT» AQ Basqarma tóraǵasy Áset Turysov.
1414 baılanys ortalyǵy jumys kúnderi saǵat 9:00-den 21:00-ge deıin jáne senbi, jeksenbi kúnderi 9:00-den 14:00-ge deıin jumys isteıdi. Tótenshe jaǵdaı kezinde baılanys ortalyǵynyń jumysyna HQKO-nyń 2000-nan astam qyzmetkeri jumyldyryldy.
