Sheteldegi qazaqstandyq týrıster Qazaqstannyń qaı qalalaryna jetkiziledi
NUR-SULTAN. QazAqparat – QR Mádenıet jáne sport mınıstrligi týrızm ındýstrııasy komıteti tóraǵasynyń mindetin atqarýshy Dastan Ryspekov sheteldegi qazaqstandyq týrısterdiń Qazaqstannyń qaı qalalaryna oralatynyn aıtyp berdi, dep habarlaıdy QazAqparat.
«18-23 naýryz aralyǵynda qazaqstandyq týrısterdi elge qaıtarý úshin 19 charterlik reıs qarastyrylǵan. Onyń 14 charterlik reısi uıymdastyrylyp, 2 818 adam elge qaıtaryldy», - dep atap ótti D. Ryspekov Ortalyq kommýnıkatsııalar qyzmetinde ótken onlaın brıfıngte.
Onyń aıtýynsha, charterlik reıster Nur-Sultan, Almaty jáne ózge de qalalarǵa uıymdastyrylyp jatyr.
«Máselen, Mysyr men Birikken Arab Ámirlikterinen Atyraý, Qostanaı qalalaryna reıs ushyryldy. Aqtóbe qalasyna da birneshe reıs qarastyrylǵan», - dedi Dastan Ryspekov.
Aıta keteıik, 18 naýryzdaǵy jaǵdaı boıynsha shetelde týrıstik operatorlar arqyly demalyp jatqan qazaqstandyqtar sany 5 914 adamdy quraǵan. Olardy qaıtarý úshin 18 naýryzdan 23 naýryzǵa deıin 19 charterlik reıs josparlanǵan.
Buǵan deıin Dastan Ryspekov týrıstik joldamalar qunynyń qalaı qaıtarylatynyn aıtyp berdi.
