Sheteldegi qazaqstandyq stýdentter úshin aqparattyq keste ázirlendi

NUR-SULTAN. QazAqparat - Jedel shtab jumysyn bastaǵannan beri qazaqstandyq stýdentterdiń shetelde oqýyn jalǵastyrý máseleleri boıynsha stýdentter men olardyń ata-analarynan kóptegen qońyraý men ótinishter kelip túsken. Osy jumystar aıasynda QR syrtqy ister mınıstrligi sheteldegi stýdentterge arnalǵan aqparattyq keste ázirledi, dep habarlaıdy QazAqparat.

«Jedel shtab qyzmetkerleri kelip túsken ótinishterdi barynsha jedel qarastyryp, olardy odan ári óńdeý úshin aqparat pen suraý salýlardy jınady, sodan keıin ótinish berýshilerge jaýabyn berdi. Bizdiń sheteldegi dıplomattarymyz kelip túsken aqparat negizinde ózderi ornalasqan elderde árbir ýnıversıtet jáne jergilikti bilim mınıstrlikterimen baılanys ornatty. Biz sheteldik oqý oryndarymen usynylǵan oqý formatyn, elge kirý-shyǵý erejelerin jáne sheteldik stýdentterdi oqytýǵa qatysty basqa da máselelerdi anyqtaýdamyz» delingen syrtqy saıasat vedomstvosynyń baspasóz qyzmeti taratqan habarlamada.

Osyǵan baılanysty Shtab sheteldegi bizdiń stýdentter úshin sheteldik oqý oryndarynyń talaptary boıynsha arnaıy aqparattyq keste ázirledi. Onlaın rejıminde jańartylatyn osy kestemen myna silteme arqyly tanysýǵa bolady.

Málimetke saı, ózara tıimdi yqpaldasý úshin biz kelesi is-qımyl algorıtmin belgiledik: ótinish berý – aqparat jınaý – sheteldik oqý oryndarymen/bilim mınıstrlikterimen baılanys ornatý – shet memleketterdiń elshilikterimen habarlasý – ótinish ıesine jaýap berý.

Qosymsha suraqtar týyndaǵan jaǵdaıda stýdentter men olardyń ata-analarynan QR SІM Shtabyna kelesi jedel jeliler arqyly habarlasýyn suraımyz: [phone], 72-00-47, 72-05-49, elektrondyq poshta - [e-mail].

Sondaı-aq, qazaqstandyq stýdentter óz suraqtaryn qaraý úshin tómendegi silteme boıynsha onlaın ótinim bere alady: – https://rb.gy/etjeox .

Aıta keteıik, buǵan deıin QR SІM sheteldegi qazaqstandyq stýdentterge kómektesý úshin jedel shtab qurǵanyn habarlaǵan edik.