Sheteldegi qazaq balalaryna arnalǵan jazǵy lagerler ýaqytsha toqtatyldy

NUR-SULTAN. QazAqparat – Pandemııaǵa baılanysty shetelde turatyn qazaq balalarynyń jazǵy lagerleri ýaqytsha toqtatyldy. Bul týraly «Otandastar qory» KEAQ vıtse-prezıdenti Maǵaýııa Sarbasov aıtty, dep habarlaıdy QazAqparat.

«Pandemııaǵa deıin shetelde turatyn etnıkalyq qazaq balalaryna Qazaqstanda ártúrli jazǵy lagerler (Nazarbaev zııatkerlik mektepteri, Baldáýren, «Týǵan elge saıahat» Balalar týrıstik poıyzy», «ZEREN» respýblıkalyq jazǵy lageri) uıymdastyrylatyn. Onyń basy-qasynda Dúnıejúzilik qazaqtar qaýymdastyǵy júretin.

Jalpy 2019 jyly shetelden 600 bala Qazaqstanǵa jazǵy lagerlerge keldi. Olar eki aptada dombyra sabaǵyna qatysyp, qazaq tilin úırenip, atajurtyn kórip, keremet marqaıyp qaıtty. Biraq, ókinishke qaraı, 2020-2021 jyldary pandemııaǵa baılanysty jobalar ýaqytsha toqtatyldy. Degemen, bul jobalar aldaǵy ýaqytta jalǵasady degen senimdemiz», - dedi M. Sarbasov Ortalyq kommýnıkatsııalar qyzmetinde ótken baspasóz máslıhatynda.

Aıta keteıik, «Otandastar» qory álemniń 12 elinde qazaq tilin úıretetin 31 onlaın synyp ashqan. Onlaın synyptar teledıdar, noýtbýk, kamera, taǵy basqa qajetti zamanaýı tehnıkalarmen qamtylǵan.

Shet elderde 250 qazaq mádenı ortalyǵy jumys isteıdi, «Otandastar» qory onyń 71-imen memorandým bekitken.