Sheteldegi qandastarymyzdyń elge kelý máselesine arnalǵan baǵdarlamalardyń kópshiligi qaǵaz júzinde qalyp otyr
ATY. 8 jeltoqsan. QazAqparat /Názıra Eleýhan/ - Búgin Almatyda «Jastar úni» qoǵamdyq birlestigi men «Bolashaq» respýblıkalyq qozǵalysy Mádenıet mınıstrliginiń qoldaýymen «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Elbasynyń Qazaqstan halqyna Joldaýy aıasynda oralman qandastardyń ózekti máselesine qatysty «dóńgelek ústel» otyrysyn ótkizdi.
Basqosýda Joldaý aıasyndaǵy qordalanǵan máseleler, jastardyń memlekettik damý barysyna qosyp jatqan úlesi, ekonomıkalyq daǵdarys kezeńindegi reformalar, kóshi-qon úderisteriniń qazirgi jaı-kúıi, memlekettik «Nurly kósh» baǵdarlamasynyń barysy, oralmandarǵa qajetti áleýmettik kómek pen qoldaýdyń deńgeıi jáne oralmandar máselesine qatysty taǵy da basqa kókeıkesti dúnıeler talqylandy. Dóńgelek ústelge belsendi oralman jastar, qoǵam qaıratkerleri men zııaly qaýym jáne BAQ ókilderi qatysty.
«Jezbuıda» jastar qoǵamdyq birlestiginiń tóraǵasy Talapbek Tynysbekovtyń aıtýynsha, elimizde oralmandar máselesine qatysty barlyq is-shara qolǵa alynǵan. Arnaıy baǵdarlama da bar. Biraq, ókinishke qaraı onyń kópshiligi qaǵaz júzinde qalyp otyr. Óıtkeni, oralmandar máselesimen aınalysatyn «Kóshi qon» komıtetine kómek kerek, Dúnıejúzilik qaýymdastyqtyń ózine qamqorlyq kerek.
Onyń sózine qaraǵanda, «Nurly kósh» baǵdarlamasy jaıly sheteldegi qandastarymyzdyń kópshiligi beıhabar. «Óıtkeni, elde jasalyp jatqan tıimdi saıasatty jetkizetin arnaıy ortalyqtar joq»,- dep atap ótti ol.
