Sheteldegi qandastarymyzdyń atamekenge oralýyna Qazaqstan dıplomattary óz úlesin qosty - Sydyqov
Ol Saılaý Batyrshaulynyń eńbek jolyna sholý jasaı otyryp, qazaq dıplomattarynyń Memleket Egemendigi týraly Deklaratsııany jáne Táýelsizdik jarııalaý jónindegi qujattardy daıyndaýǵa qosqan úlesteri týraly baıandady.
«Respýblıkamyzdyń syrtqy saıasatyn ýaqyt talabyna laıyq mol bilimmen zor tabandylyqpen júzege asyrý barysynda S. Batyrshauly aıanbaı eńbek etip, dıplomatıkalyq ónerdiń tamasha úlgisin kórsetti. Ol ózine júktelgen dıplomatıkalyq jumystardy abyroımen atqara júrip, KSRO Syrtqy ister mınıstrligine keńesshi degen deńgeıge deıin kóterildi.
Jaýapkershiligi orasan zor dıplomatııalyq, memlekettik qyzmetter atqarǵan azamattyń bıikterge sharyqtaǵan da, qısynsyz qýdalanǵan da sátteri boldy. Táýelsizdik samaly esken jyldarda Qazaqstannyń syrtqy saıası mekemesine kásibı, kádimgi dıplomat qajettiligi týyp, Prezıdent N. Nazarbaevtyń Jarlyǵymen Syrtqy ister mınıstrliginiń buryn bolmaǵan orynbasary shtaty engizildi. Sol orynǵa S.Batyrshauly taǵaıyndalyp, halyqaralyq deńgeıdegi belsendi dıplomatııalyq qyzmetter atqarýyna jol ashyldy. Qazaq dıplomattary 1990 jyly Memleket Egemendigi týraly Deklaratsııany jáne Táýelsizdik jarııalaý jónindegi qujattardy daıyndaýǵa óz úlesterin qosty. Syrtqy ister mınıstrligi bul mańyzdy qujattarǵa óz tarpynan «Qazaqstannyń shet eldermen saıası, saýda jáne mádenı baılanystar jasaýyna ózindik quqyǵy bar ári bizdiń el dúnıe júzindegi qazaqtardyń atamekenine oralýyna jaǵdaı jasaıdy» degen tarmaqty usyndy. Mońǵolııaǵa úsh ret resmı saparmen baryp, 60 myńnan astam qazaqtyń tarıhı otanyna oralýyna múmkindik týǵyzǵan qujattardyń qabyldanýyna tikeleı at salysty», - dep atap ótti akademık E. Sydyqov.
