Sheteldegi qandastarymyz atajurtta dop tebedi

ASTANA. QazAqparat -  «Er Jánibek»  halyqaralyq qoǵamdyq qorynyń uıymdastyrýymen 13-15 shilde aralyǵynda Petropavl qalasynda shaǵyn fýtboldan dástúrli «ER JANIBEK CUP» halyqaralyq týrnıri ótedi, dep habarlaıdy QazAqparat tilshisi. 

Osymen tórtinshi márte uıymdastyrylǵaly otyrǵan doda ataqty ánshi, kompozıtor, birtýar óner dúldúli Segiz seri Bahramulynyń 200 jyldyq mereıtoıyna arnalyp otyr.

Atalǵan týrnırdiń basty maqsaty - Bahramulynyń eńbegi men ónegeli ómirin jastarǵa úlgi ete otyryp, shetelde turatyn qazaq jastaryna táýelsiz Qazaq eliniń tynys-tirshiligin tanystyrý, sporttyq oıyn arqyly Atajurtymen mádenı-rýhanı baılanysyn nyǵaıtý.

«Er Jánibek» halyqaralyq qoǵamdyq qorynyń «ER JANIBEK CUP» týrnırine Frantsııa, Avstrııa, Danııa, Túrkııa, Iran, Qytaı, Reseı, Monǵolııa, Ózbeksten, Qyrǵyzstanda turatyn qazaq jastarynan quralǵan komandalar jáne Qazaqstannyń ár oblysynan jınalǵan qazaq fýtbolshylary qatysady.

Eske salsaq,  «Er Jánibek» halyqaralyq qoǵamdyq qory 2006 jyly Qazaqstanda qurylǵan. Halyqaralyq qor shetelderde jáne elimizde mádenı-rýhanı, qazaq tarıhyndaǵy eleýli tulǵalardy dáripteýge arnalǵan sharalardy uıymdastyryp, aıtys óneri men Alash arystaryna arnalǵan jobalardy qoldap, qarjylandyrýmen aınalysady.