Sheteldegi qandastarǵa arnalǵan onlaın kontsert ótedi

NUR-SULTAN. QazAqparat – Búgin, 22 tamyzda saǵat 21:00-de Dúnıejúzi qazaqtarynyń qaýymdastyǵy, «Otandastar qory» jáne «Qazaqkontsert» uıymy birlesip, «Uly dala elinen» atty «TURAN» ansambli ártisteriniń onlaın kontsertin uıymdastyrady, dep habarlaıdy QazAqparat.

Kontserttiń maqsaty – mýzykalyq óner arqyly ulttyq biregeılikti saqtaý, qazaq dıasporasyna rýhanı qoldaý kórsetý, sheteldegi qandastarmen baılanysty nyǵaıtý.

Ansambl qazaq halqynyń ulttyq mýzykalyq murasyn jańǵyrtyp, umyt bola bastaǵan tól aspaptardyń súıemeldeýimen ózderiniń úzdik týyndylaryn oryndaıdy. «TURAN» ansambli ulttyq mýzykalyq aspaptardyń dybysyn qazirgi zamanǵa saı laıyqtap, jańa formatta usynyp júr. On jyldyq tarıhy bar óner ujymy qazaq ulttyq mýzykasyn álemge áıgilep, 70-ten astam shet memlekette 600-den astam jeke kontsert bergen. Ansambldiń quramynda Serik Nurmoldaev, Maqsat Medeýbek, Baýyrjan Bekmuhanbetov, Erjigit Álıev, Jantý Dadabaev syndy talantty mýltı ınstrýmentalıst mýzykanttar bar. Qazaq halqynyń otyzdan astam ulttyq mýzykalyq aspaby bolsa, mýzykanttardyń árqaısysy solardyń birnesheýinde oınaýdy meńgergen.

Onlaın kontsert Otandastar channel YouTube arnasynda kórsetiledi, barshaǵa qoljetimdi. Bul bastama QR Aqparat jáne qoǵamdyq damý mınıstrliginiń tapsyrysymen júzege asyp otyr.