Sheteldegi qandastarǵa arnalǵan «El.kz» portalynyń jobasy tanystyryldy
Sharaǵa QR Aqparat jáne qoǵamdyq damý vıtse-mınıstri Marat Ázilhanov, QR Syrtqy ister mınıstrliginiń ókilderi, «QazAqparat» HAA Basqarma tóraǵasy Asqar Ýmarov, «Otandastar qorynyń» vıtse-prezıdenti Maǵaýııa Sarbasov jáne 5 eldegi «Abaı» mádenı-iskerlik úıleriniń basshylary qatysýda.
Onlaın formatta ótip jatqan jıyn barysynda sheteldegi qazaqtar men elge oralǵan qandastar úshin qajetti málimettiń qoljetimdiligin, olardyń bir aqparat kózinen taratylýyn qamtamasyz etý jáne syrttaǵy qazaqtardyń tarıhı otanymen ózara dıalog alańyn qalyptastyrý maqsatynda «El.kz» aqparattyq-tanymdyq portalynyń jobalary tanystyryldy.
«El.kz» portalynyń bas redaktory Nurgúl Qalıeva sheteldegi qandastardy jumyla jumys isteýge shaqyrdy.
«Otandastar qorymen» birlesip jumys júrgizýdemiz. Birlesken jobamyzdyń biri – ol «El.kz» aqparattyq-tanymdyq portalynan «Qandastar» paraqshasy ashyldy. Bul paraqsha jalpy, syrtta júrgen qandastarymyzǵa jáne elge oralǵan qandastarǵa arnalǵan. Atap aıtqanda, aqparattyq dıalog alańy. Osy oraıda baılanys ornatýdyń jaqsy platformasy bolady dep senemiz», - dedi N. Qalıeva.
Bul turǵyda ol «El.kz» portaly qazaqstandyq aqparat naryǵynda óziniń ornyn oıyp turyp alýǵa qaýqarly ekenin ári bedeldi aqparat quraldarynyń birine aınalǵanyn atap ótti.
«2019 jyly bizdiń paraqshanyń qaralym sany 3 mıllıonǵa deıin jetti. Sondaı-aq biz áleýmettik jelide de belsendimiz. «Qandastar» paraqshasy alty bólimnen turady: jańalyqtar, «Atajurt», «Jas qazaq», «Otandastar qory», kómek, saraptama. Jańalyqtar bólimine toqtalsaq, onda dúnıejúzi qazaqtarynyń, sheteldegi qazaq-mádenı ortalyqtarynyń, qandastarymyzdyń ótkizip jatqan sharalary jańartylyp, únemi berilip otyrady. «Atajurt» bóliminde elge oralǵan ári sheteldegi qandastarymyzdyń ómir tarıhy jáne basqa da aýqymdy materıaldar beriledi», - dep naqtylady portaldyń bas redaktory.
