Sheteldegi qandastardy elge ákelýdiń tujyrymdamasy ázirlenip jatyr

NUR-SULTAN. QazAqparat – Shet memleketterde turatyn qandastardy elge qaıtarýdyń tujyrymdamasy ázirlenip jatyr. Bul týraly «Otandastar qory» KEAQ vıtse-prezıdenti Maǵaýııa Sarbasov málim etti, dep habarlaıdy QazAqparat tilshisi.

«Memleket basshysy bıylǵy Joldaýynda qandastardyń kóshi-qon saıasatynyń tujyrymdamasyn ázirleý týraly tapsyrma berdi. Qolǵa alynǵan 2022-2026 jyldarǵa arnalǵan jańa tujyrymdamada sheteldegi qandastarmen áleýmettik jáne bilim berý salasy boıynsha jumystardy jandandyrý mindeti tur. Jáne de sheteldegi qazaq dıasporalarymen mádenı baılanysty ilgeriletý jospary tur.

Jalpy táýelsizdik alǵaly sheteldegi qandastar máselesi únemi nazarda, bul baǵytta memleket tarapynan tıisti qoldaý jasalyp jatyr.

Bizdiń qordyń negizgi 4 jumys baǵyty bar. Aldymen, syrttaǵy qandastardyń ulttyq biregeıligin saqtaý. Elge kelgen qandastarymyzdyń otanyna beıimdelýine jaǵdaı jasaý. Úshinshiden, sheteldegi qandastardy elge qaıtarý máselesine taldaý júrgizý ıaǵnı zertteý. Tórtinshi baǵyt – sheteldegi qandastarmen ásirese jastarmen baılanys ornatý», - dedi Maǵaýııa Sarbasov.

Buǵan deıin «Otandastar qorynyń» vıtse-prezıdenti sheteldegi 1 mıllıonǵa jýyq qandasymyz elge kóship kelýge nıetti ekenin jetkizdi.