Sheteldegi qandastar oralman kvotasyn ıelený úshin Qazaqstan elshilikterine ótinish bere alady - Kóshi-qon komıteti
ASTANA. Sáýirdiń 15-i. QazAqparat /Qanat Mámetqazyuly/ - Jańa jobaǵa sáıkes, sheteldegi qandastar oralman kvotasyn ıelený úshin ózderi turyp jatqan eldegi Qazaqstan elshilikterine ótinish bere alady.
Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev osylaı málim etti, dep habarlaıdy QazAqparat.
Komıtet tóraǵasynyń aıtýynsha, jańa zań jobasynda etnıkalyq kóshi-qonǵa qatysty elimizdiń ustanǵan ıdeologııasy tutastaı saqtalyp otyr. Sonymen qatar, etnıkalyq qandastardyń tarıhı Otanyna kirigý jaǵdaıyn jaqsartýǵa baǵyttalǵan birqatar jańa normalar kózdelgen.
«Dálirek aıtqanda, etnıkalyq qazaqtar kóship kelý kvotasyn ıelený týraly óziniń turyp jatqan elinen-aq ótinish jasaı alady. Bul norma buryn qarastyrylmaǵan edi. Endigi kúni jańa normaǵa sáıkes, shetelde turyp jatqan qazaq qandastarymyz Qazaqstan elshilikteri arqyly ótinish bere alady», dedi Q. Ábishev.
Budan keıin, kvotaǵa qosylý týraly kelisim alǵannan soń, oralmandar elge kelgen 5 kúnniń ishinde oralman mártebesin, on kún ishinde turaqty turýǵa arnalǵan ruqsatty, al bir aıdyń ishinde áleýmettik qyzmetter paketin ıelene alady.
