Sheteldegi qandastar máselesi boıynsha Izraıl tájirıbesi zerdelenip jatyr
NUR-SULTAN. QazAqparat – «Otandastar Qory» KEAQ qyzmetkerleri Izraıl memleketine issaparmen baryp, shettegi qandastardy qoldaý boıynsha sol memlekettiń tájirıbesin zerdeledi.
Atalǵan is-shara «Otandastardy Otanyna qaıtarýdy memlekettik qoldaýdyń halyqaralyq tájirıbesin zerdeleý» zertteý jobasy aıasynda júzege asqan, dep habarlaıdy QazAqparat.
Sapar maqsaty – turyp jatqan elderinde dıasporalardy qoldaýdyń ártúrli mehanızmderiniń halyqaralyq tájirıbesimen, memlekettik jáne basqa baǵdarlamalar negizinde shetelde turatyn otandastardyń elge oralýyn, qonys aýdarýyn (repatrıatsııa) qamtamasyz etý tájirıbelerimen tanysý. Sonymen qatar, elde beıimdelýge kómek kórsetý jáne dıaspora máseleleri boıynsha Izraıl memleketiniń zańnamasyn zerdeleý.
Osyǵan baılanysty sapar aıasynda «Otandastar Qory» qyzmetkerleri birqatar kezdesýler ótkizdi. Atap aıtqanda, Izraıl memleketiniń Alııa (repatrıatsııa) jáne ıntegratsııa mınıstrliginiń bas ǵalymy Vladımır (Ze’ev) Hanınmen, osy mınıstrliktiń absorbtsııa jónindegi keńesshisi Denıs Neraslavskıımen, Ashdod qalasy meriniń orynbasary Elı Nahtpen, repatrıatsııa máseleleri boıynsha advokattar Olesıa Moshkovıch, Natalı Al, sondaı-aq, zań keńsesiniń qyzmetkerleri - kóshi-qon quqyǵynyń mamandarymen, Izraıl boıynsha Evreı agenttiginiń jahandyq servıs ortalyǵynyń dırektory Iosef Leıbovıchpen (Qazaqstandaǵy «Sohnýt» Evreı Agenttigi ókildiginiń burynǵy basshysy) júzdesip, nátıjeli áńgimeler órbidi.
Sapar aıasynda qyzmetkerler sheteldegi otandastardy memlekettik qoldaý tájirıbesin zerttep, Izraıldiń jalpy quqyqtyq bazasyna taldaý jasaldy. Sheteldegi otandastardy repatrıatsııalaý jáne qoldaý máseleleri boıynsha Izraıl memlekettik saıasaty, sondaı-aq eldiń kóshi-qon saıasatynyń erekshelikteri zerdelendi.
«Izraıl memleketiniń tájirıbesi osy saladaǵy qazaqstandyq zańnamany jetildirýde qoldanylatyn bolady. Sonymen qatar, Izraıl tájirıbesi negizinde repatrıanttarǵa, sondaı-aq shetelde turatyn otandastarǵa qatysty qoldaý júıesin jetildirý, balalar jáne jastar baǵdarlamalaryn ázirleý, repatrıanttardy «absorbtsııa kárzeńkesi», medıtsınalyq saqtandyrýmen jáne repatrıanttarǵa qatysty ózge de jeńildiktermen qamtamasyz etý tájirıbesin, qazaqstandyq zańnamanyń erekshelikterin eskere otyryp, qoldaný qajet», delingen baspasóz baıanynda.
