Sheteldegi etnıkalyq qazaqtarǵa júzdegen oqý granty bólindi
«Búgin elimizdegi joǵary oqý oryndarynda bilim alýǵa arnalǵan stıpendııalyq baǵdarlamaǵa qujat qabyldaý bastaldy. Baǵdarlamaǵa shetel azamattary, onyń ishinde Qazaqstan Respýblıkasynyń azamatyǵy joq qazaq ultynyń ókilderi qatysa alady. Ótinish berý onlaın formatta QR ǴJBM Joǵary bilimdi damytýdyń ulttyq ortalyǵynyń veb-portaly (veb-saıty) arqyly júzege asyrylady», - dep jazady mınıstrliktiń baspasóz qyzmeti.
Naqtyraq aıtsaq, bakalavrıat, magıstratýra jáne doktorantýranyń bilim berý baǵdarlamalary boıynsha Qazaqstannyń joǵary oqý oryndarynda shetel azamattaryn oqytý úshin 550 grant bólinip otyr.
«Onyń ishinde bakalavrıatqa 490 grant, magıstratýraǵa 50 grant, PhD doktorantýraǵa 10 grant bólingen. Baǵdarlama aıasynda tegin bilim berý men bilim alýshynyń akademııalyq jetistikterine baılanysty aı saıynǵy stıpendııa tólenedi», - delingen resmı málimette.
Onlaın qujat qabyldaý mınıstrliktiń Joǵary bilimdi damytý ulttyq ortalyǵynyń saıtynda 30 naýryzda bastap, 30 maýsymǵa deıin jalǵasady.
Úmitkerlerdi irikteý usynylǵan qujattar, beıimdelý áleýetin anyqtaýǵa arnalǵan onlaın-testileý nátıjeleri jáne onlaın áńgimelesý negizinde júrgiziledi. Stıpendıattar tizimi bıylǵy jyldyń 28 tamyzyna deıin jarııalanady.
Qosymsha suraqtar boıynsha myna nómirler arqyly jaýap alýǵa bolady: +7 (7172) 28 75 26, 28 75 31.
