Sheteldegi demalys kezinde tosyn jaıtqa tap bolmaýdyń qandaı joly bar
ASTANA. QazAqparat - QR Mádenıet jáne sport mınıstrliginiń Týrızm komıteti shetelge demalýǵa barǵan kezde tosyn jaıtqa tap bolmaý úshin ne isteý kerektigin aıtty, dep habarlaıdy QazAqparat.
«Sońǵy ýaqytta alaqol týrıstik operatorlardyń kinásinen shet memleketterge saparlap barǵan qazaqstandyq týrısterdiń jatyn oryndaryna aqy tólenbeı dalada qalý oqıǵalary jıilep ketti. Ózderińizde biletindeı, «Qazaqstan Respýblıkasyndaǵy týrıstik qyzmet týraly» QR Zańyna sáıkes, naryqtyń barlyq qatysýshylary qyzmetterin kóshpeli týrızm salasynda qazaqstandyqtardyń quqyqtaryna kepil berý júıesi aıasynda júzege asyrýǵa mindetti. 2016 jyldyń qazanynda kóshpeli týrızm salasyndaǵy QR azamattarynyń quqyqtaryna kepil berý júıesiniń jumys isteý erejesi bekitilip, azamattardyń quqyqtaryn kepildendirý júıesi engizildi jáne júıe ákimshisi aıqyndaldy. Bul arnaıy qurylymnyń jalǵyz ǵana qyzmeti - shetelge shyqqan azamattardy qorǵaý», - dedi komıtet tóraıymy Manıýra Myrzamadıeva.
Kepil berý júıesiniń ákimshisi - «Týrıstik qamqor» korporatıvtik qory. Bul qordyń maqsaty - eger týrıstik operator óz mindettemesin oryndamaǵan jaǵdaıda ýaqytsha ózge memlekette júrgen qazaqstandyq týrısterdi elge jetkizý boıynsha shuǵyl kómek kórsetý. Týrıstik júıe ákimshisine júgingen jaǵdaıda arnaıy esepshot qarjysy esebinen shuǵyl kómek alýǵa quqyly bolady.
«Osyǵan baılanysty QR Mádenıet jáne sport mınıstrligi Qazaqstan azamattarynyń nazaryn týrıstik ónimdi satyp alý barysynda týrıstik kompanııadan týrıstik ónimdi usynyp otyrǵan operator men «Týrıstik Qamqor» korporatıvtik qory arasynda jasalǵan kelisisharttyń bolýy týraly aqparatty naqtylaý qajettigine aýdartady», - dedi komıtet tóraıymy.
Aıta keterligi, óz betinshe shetelge saparmen shyǵatyn týrıster demalystarynyń jaıly ótýine jaýapty bolady.
«Týrıstik Qamqor» qorynyń dırektory Asylhan Esilovtiń aıtýynsha, týrıstik kompanııany tańdaý jáne onymen kelisimshart jasasý syndy kúrdeli iske barynsha jaýapkershilikpen qaraý qajet.
«Týrıstik agenttikti durys tańdaý sizdiń jaıly demalysyńyzǵa ǵana emes sonymen qaýipsizdigińizge de baılanysty bolady. Týrısti qyzmet kórsetýge arnalǵan kelisimshartty rásimdeýge de barynsha tyńǵylyqty nazar aýdarǵan jón. Sizdiń odan arǵy saparyńyz fırmamen týrıstik qyzmet kórsetýge arnalǵan gartpen qanshalyqty jan-jaqty tanysqanyńyzǵa baılanysty bolmaq», - dedi ol.
Esilovtiń aıtýynsha, kelisimsharttyń bas jaǵyndaǵy jáne mórindegi kompanııa ataýy bir-birimen sáıkes kelýi tıis. Týrıstik agenttik kelisimshartty barynsha túsinikti jasaýy shart. Barlyq datalardyń, aqshalaı tólemderdiń, aldaǵy ýaqytta baratyn oryndy jáne demalys kúnderiniń sanyn durys ekendigin tekserý qajet. Kelisimshartta kórsetilgen aıyppul sanktsııalaryna jáne qyzmetterge tólem nysanyna aıryqsha nazar aýdarýy kerek. Qosymsha suraqtar qoıyp, naqtylaýdan qysylmaǵan durys.
Asylhan Esilov týrıstik TÝRKOD alý qajettigine de aıryqsha nazar aýdartady. Ol shekarany kesip ótken sátte beriledi ári vaýcherde (joldamada) kórsetiledi. Barlyq týrıster kez kelgen týrdi satyp alǵan kezde TÝRKOD talap etýi qajet jáne ony www.fondkamkor.kz saıtynan teksergenderi durys.
«TÝRKOD týrıstik operator óz mindettemesin oryndaýy múmkin emes jaǵdaıda elge oralýdyń kepili sanalady. Týrıstik operator óz mindettemesin oryndamaý jaǵdaıy týyndaǵan sátte TÝRKOD bolsa, onda kepil berý júıesiniń ákimshisi sizdiń úıge oralýyńyzdy qamtamasyz etedi», - dedi ol.
Onyń dereginshe, kóshpeli týrızm salasynda qazaqstandyqtardyń quqyqtaryna kepil berý júıesinde 62 qazaqstandyq týrıstik operator tirkelgen. Jalpy, Qazaqstanda týrıstik qyzmetke 1,5 myńnan astam lıtsenzııa berse, sonyń búginde 500-ge jýyǵy ǵana jumys isteıdi
