Sheteldegi aktıviniń somasy 100 mln dollardan asatyn adamdar kapıtalynyń zańdylyǵy tekseriledi - Zań
Onyń sózine qaraǵanda, atalǵan zań jobasyn qabyldaý kezinde Májilistegi barlyq saıası partııalardyń fraktsııalary, birmandatty okrýgterden saılanǵan depýtattar qujat jobasyn maquldaıtyndaryn aıtyp, usynylǵan tujyrymdardy tolyǵymen qoldaǵan. Keıin Májilis qabyldaǵan zańdy Senat ta maquldaǵany belgili.
Degenmen, Snejana Imashevanyń aıtýynsha, Parlamentke keıbir sarapshylar men zańgerlerden, konstıtýtsııa mamandarynan qabyldanatyn zańnyń Atazańǵa sáıkestigin tekserý qajettigi týraly ótinim túsken.
«Prezıdent zańǵa qol qoımaı turyp onyń Ata zańǵa sáıkestigin teksertý úshin Konstıtýtsııalyq sotqa júgindi. Keshe Konstıtýtsııalyq sot ony Ata zańǵa saı dep tanyp, normatıvtik qaýly shyǵardy», - dep jazdy depýtat Facebook paraqshasynda.
Depýtat elimizde at tóbelindeı toptyń jerdiń ústi men astyndaǵy baılyqty ózara enshilep alǵanyn, sonyń yqpalymen ekonomıkada, saıasatta ústemdik quryp kelgenin, al qalǵan halyq úlken tabys tappaq túgil, jaıly turmysqa zar bolyp otyrǵanyn aıtady.
«Árıne, baı bolýǵa eshkim tyıym salǵan joq. Álemniń kez kelgen elinde sheksiz baı da, shekiz kedeı de bar shyǵar. Óz dáýletin aqyly men biliminiń, tynymsyz eńbektiń arqasynda eselep jatqandarǵa eshqandaı suraq joq. Al qolyndaǵy qyzmetiniń, joǵary laýazym ıelerimen tanystyǵynyń, ákimshilik resýrstardyń, aýyz jalasqan jemqorlyqtyń arqasynda kapıtal ıemdengenderge ıemdengenderge suraq týyndaýy ádiletti. Olar qolyndaǵy baılyqtyń qaıdan kelgenin, qandaı jolmen kelgenin dáleldeý kerek. Zańnyń basty maqsaty qalaı oryndalatynyn ýaqyt kórseter. Quqyqtyq negiz kerek edi – jasaldy. Qajet bolsa tolyqtyrylady», - deıdi Mádilis depýtaty.
Snejanna Imasheva zańsyz alynǵan aktıvti qylmystyq isten tys tárkileýdiń álemdik tájirıbede bar tásilin ulttyq zańnamaǵa engizetinin aıtady.
Bul jerde «erikti qaıtarý» jáne «azamattyq májbúrlep qaıtarý» quraldary qoldanylady. Áýeli aktıviniń somasy 100 mln dollardan asatyn adamdardyń kapıtalynyń zańdylyǵy tekseriledi. Bul tulǵalardy Úkimet músheleri men Parlament depýtattarynan, qoǵamdyq uıym ókilderinen quralǵan arnaıy komıssııa tizimge alady. Tizimge engen adamdar kapıtalynyń zańdylyǵyn ashyp kórsetý kerek degen sóz. Zańdylyǵyn dáleldeý úshin tıisti deklaratsııa tapsyrady. Zańsyz aktıvterdi izdeý men qaıtarý isi Bas prokýratýranyń janynan qurylatyn komıtetke júkteledi. Qaıtarylǵan aktıvter qorǵa aýdarylyp, ári qaraı qazaqstandyqtardyń áleýmettik máselelerin sheshýge baǵyttalady.
«Bas prokýratýra janyndaǵy zańsyz aktıvterdi qaıtaratyn komıteti qolda bar qarajattan qarjylandyrady. Budan bólek balama joly da kózdelgen. Qajet bolǵan jaǵdaıda komıtet jumysyna alǵashqy lekpen qaıtarylǵan qarajat ta jumsalýy múmkin», - deıdi Snejana Imasheva.
