Sheteldegi aǵaıyndardyń elge oralýy kúrt azaıdy - S. Balǵabaev
ALMATY. 26 sáýir. QazAqparat /Ádilet Musahaev/ - Sheteldegi aǵaıyndardyń elge oralýy kúrt azaıdy, ony moıyndaýymyz kerek. Sondaı-aq kóshi-qon tóńireginde jemqorlyq asqyndady.
Bul jaıynda jazýshy-dramatýrg, Dúnıejúzi qazaqtary qaýymdastyǵy tóraǵasynyń orynbasary Sultanáli Balǵabaev Almatyda kóshi-qon máselesine baılanysty ótken jıyn barysynda aıtty.
S.Balǵabaev osy eki máseleni kóterip, "Egemen Qazaqstanǵa" birneshe materıal da jazǵan. Kóshi-qon komıteti ІІM-ne qosylǵannan keıin aldaǵy jumys qalaı atqarylady dep, Kóshi-qon polıtsııasy komıtetiniń tóraǵasy, mılıtsııa general-maıory Hıbratýlla Dosqalıevpen aqyldasyp, Etnıkalyq kóshi-qon jónindegi qoǵamdyq keńes qurylǵan. Bul keńestiń mindeti kóshi-qon jónindegi máseleler boıynsha keńes berip, ondaǵy problemalardy joǵaryǵa jetkizip otyrý.
"Kóshi-qondaǵy máselelerdiń barlyǵy zańnyń solqyldaǵynan dep oılaımyn, ıaǵnı zańnyń naqty emestiginen týyndap otyr. Bizde zań shyǵady, alaıda onyń mehanızmi jasalmaı qalady. Mysaly, oralmandardyń barlyǵyna jer alýǵa bolady dep kórsetiledi, biraq aýdannyń ákimderi jerdiń bári jeke menshikke ótip ketken dep oralmandardy shyǵaryp salady. Zańnyń osyndaı keleńsizdikterin talqylyp, onyń naǵyz mehanızmin jasaýymyz kerek", -deıdi S.Balǵabaev.
Sondaı-aq ol Kóshi-qon salasyndaǵy jemqorlyqty aıtyp ótti. "Bul 2005 jyldan bastaldy. Osy jóninde qaýymdastyqtyń atynan Kóshi-qon basshylaryna jemqorlyqty toqtatý kerek degen talaı hat ta jazdyq. Odan eshtene shyqpaǵan soń Ulttyq qaýipsizdik komıteti aldyna qoıdyq", -deıdi jazýshy.
Onyń aıtýynsha, jylyna 20 myń otbasynyń elge oralýyna qarjy bólinip otyrady eken. Bir otbasy keminde bir mıllıon teńge alady. "2005 jyldan beri bizdiń esebimizshe jyl saıyn 5-6 mıllıard teńge oralmandardyń atynan jalǵan qujat jasaýshylardyń qaltasyna ketip otyrdy. Máselen járdem aqy alǵan adamǵa eshkim baqylaý jasaı almaıdy. Osyny týra jolǵa qoıatyn mehanızmin jasaýymyz kerek. Ótkende bas prokýratýrada bolǵan jıynda H.Dosqalıev 67 myń adam Qazaqstannyń járdemaqysyn alyp, jeke kýáligin almaı qashyp júrgendigin óz baıandamasynda aıtyp ótti. Meniń oıymsha, ol adamdar ne ómirde joq, bolmasa aqshasyn alyp, qaıta qaıtyp ketken", -dep atap ótti óz sózinde S.Balǵabaev.
Sonymen qatar ol Kóshi-qondy uıymdastyrý jumysyn qaıta qaraý kerek degen usynys jasady. "Bizde ony uıymdastyrýdy Syrtqy ister mınıstrligine júktegen. Sheteldegi elshilikterde onymen aınalysatyn shtat ta, qyzmetshi de joq. Oǵan qarjy bólip, sheteldegi aǵaıyndar arasynda elge oralý jóninde durys nasıhat jasasa jaqsy bolar edi", -deıdi ol.
