Sheteldegi úzdik qazaq tildi BAQ anyqtaldy
ASTANA. KAZINFORM — «Otandastar qory» kommertsııalyq emes aktsıonerlik qoǵamy uıymdastyrǵan «Otandastar medıa syılyǵy» baıqaýynyń jeńimpazdary anyqtaldy. Baıqaý Ybyraı Altynsarınniń 185 jyldyq mereıtoıyna oraı uıymdastyryldy.
Konkýrsqa sheteldegi BAQ-ta resmı jumys isteıtin qazaq jýrnalısteri men shetelde tirkelgen qazaqtildi basylymdar qatysty. Ótinimder 13-29 qazan aralyǵynda onlaın formatta qabyldandy. «Úzdik BAQ», «Úzdik jýrnalıst», «Úzdik jas jýrnalıst» nomınatsııalaryna 20-ǵa jýyq ótinim túsken.
Jumystardy Turkistan, Aiqyn, EgemenQazaqstan, AstanaAqshamy jáne «Medıa damytý qory» korporatıvtik qorynyń ókilderinen turatyn qazylar alqasy baǵalady.
Qazylar alqasynyń sheshimimen jeńimpaz atanǵandar:
«Úzdik BAQ» — Baıan-Ólgıı aımaqtyq Buqaralyq qazaq radıosy (Mońǵolııa). 60 jyldyq tarıhy bar radıo 2025 jyly «Baıan-Ólgıı aımaǵynyń úzdik mekemesi» syılyǵyn alǵan.
«Úzdik jýrnalıst» — Juldyz Jumaǵulqyzy (Mońǵolııa). Baıan-Ólgıı aımaǵyndaǵy qazaq tilinde habar taratatyn «Derbes» telearnasynyń jýrnalısi.
«Úzdik jas jýrnalıst» — Bekbolat Muhtarov (Ózbekstan). Eńbek jolyn 2021 jyly «Nurly jol» gazetinde tilshi bolyp bastady, 2024 jyly «Ult.kz» aqparattyq portalynda eńbek etti. 2026 jyldyń aqpanynan beri qaıtadan «Nurly jol» gazetiniń tilshisi.
Jeńimpaz Juldyz Jumaǵulqyzy jýrnalıstıka salasynda 15 jyldan beri qyzmet etip keledi. Ol baıqaý jóninde óz pikirin bildire ketti.
— Eń aldymen, sheteldegi qazaqtildi aqparat quraldarynyń ókilderine qoldaý kórsetip, olardyń eńbegin elep-eskerip, kásibı qyzmetine laıyqty baǵasyn berip otyrǵan «Otandastar» qoryna shynaıy alǵysymdy bildirgim keledi.
Men Mońǵolııanyń Baıan-Ólgıı aımaǵyndaǵy Derbes telearnasynda jýrnalıstıka salasynda 15 jyldan beri qyzmet istep kelemin.
Bizdiń telearnanyń negizgi maqsaty, Mońǵolııada ómir súrip jatqan qazaq aǵaıyndarǵa ana tilinde aqparat taratý, týǵan tiliniń qadir-qasıetin saqtaýǵa, ulttyq bolmysy men rýhanı qundylyqtaryn umytpaýǵa óz úlesin qosý. Óıtkeni til — ulttyń jany, halyqtyń rýhanı tiregi. Al sol tilimizde aqparat alyp, jańalyqpen sýsyndaý — árbir qazaq úshin úlken múmkindik ári qajettilik, — deıdi ol.
Derbes telearnasy tek jańalyqtar taratýmen shektelmeıdi. Biz kórermenderimizge rýhanı-tanymdyq baǵdarlamalar, erkin suhbattar, aǵartýshylyq baǵyttaǵy habarlar usynyp, bilim, mádenıet, tárbıe jáne densaýlyq taqyryptaryn da keńinen qamtýǵa tyrysamyz.
Juldyz Jumaǵulqyzy qazaq tilindegi árbir efır, árbir baǵdarlama, árbir jańalyq–urpaqtar arasyndaǵy tildik baılanysty jalǵap turǵan altyn kópir ekenin atap ótti.
— Búgingi urpaq óz ana tilinde sóılep, oqyp, aqparat alyp ósse, erteńgi kúni de ulttyq bolmysymyzdyń saqtalatynyna senemiz. Mundaı qoldaý men marapat bizdiń kúndelikti eńbegimizge berilgen baǵa ǵana emes, sheteldegi qazaq jýrnalıstıkasyna kórsetilgen qurmet pen senimniń belgisi. Qazaqstan men Mońǵolııa arasyndaǵy dostyq pen yntymaqtastyq qarym-qatynastyń nyǵaıa túsýine tilektespin, — deıdi Juldyz Jumaǵulqyzy.
Jeńimpazdar 13-16 qarasha Shymkent jáne Túrkistan qalalarynda ótetin «Kıeli Qazaqstan» jobasy barysynda marapattalady. Ár nomınatsııa jeńimpazyna baǵaly syılyq tabystalady.
Aıta ketelik «Tumar» men «Úrker» syılyǵynyń jeńimpazdary anyqtalǵan edi.
