Sheteldegi Qazaqstannyń dıplomattary tekserýden ótedi - SІM
ASTANA. KAZINFORM – Sheteldegi Qazaqstannyń dıplomattary tekserýden ótedi. Bul týraly Syrtqy ister mınıstrliginiń resmı ókili Aıbek Smadııarov málim etti.
«Jyl saıyn shetelge shyǵar aldynda mınıstrlik qyzmetkerleri arnaıy testileýden, túrli komıssııadan, sondaı-aq psıhologııalyq tekserýden ótedi. Memlekettik qyzmet ister agenttimen birlese bul jumysty qolǵa aldyq. Sondyqtan barlyq qyzmetker psıhologııalyq jáne emotsıonaldyq turǵydan arnaıy testiden taǵy da ótedi», - dedi A. Smadııarov mınıstrliktegi baspasóz máslıhatynda tilshiler suraǵyna jaýap bere otyryp.
Onyń aıtýynsha, dıplomatııalyq jumystyń sıpatyna qaraı ár qyzmetker tekseristen ótýi kerek.
Budan buryn habarlanǵandaı, Syrtqy ister mınıstrliginiń resmı ókili áıelin urdy dep kúdikke ilingen Qazaqstannyń BAÁ-degi elshiligindegi keńesshi Sáken Mamashqa qatysty túsinik berdi.
Qyzmetinen bosatylǵan S. Mamash dıplomatııalyq salada 15 jyldan astam jumys istegen.