Sheteldegi qazaq jádigerleriniń katalogi jasalady

ASTANA. KAZINFORM – Ulttyq mýzeı dırektory Berik Ábdiǵalıuly Jibek Joly telearnasyna bergen suhbatynda sheteldegi qazaqı jádigerlerdi túgendeý jumystary bastalǵanyn málim etti.

Mýzeı basshysynyń sózinshe, qazir Ulttyq mýzeıde 200 myńnan astam eksponat bar. Olardy tamashalaýǵa jylyna 600 myń adam keledi. Endi osy qordy baıytý úshin sheteldegi qazaq jádigerlerine túgendeý júrgizý kózdelip otyr.

— Aldaǵy 5 jylda qazaqtyń shetelde jatqan jádigerlerin túgendep katalogterin shyǵarýdy kózdep otyrmyz. Bul qolymyzdan keledi, mamandarymyz bar. Demeýshi bolsyn, memleketten bolsyn, qarajat tabylyp jatsa, uıymdastyrýǵa bolady. Syrttaǵy jádigerdiń bárin ákelmesek te, árbir azamat qaı elde qandaı jádigerimiz jatqanyn katalogke qarap biletindeı bolý kerek. Túpnusqasyn nemese kóshirmesin ákelý — ekinshi másele. Biraq túgendeýimiz kerek. Qazir osy jumysty qolǵa alyp jatyrmyz, — dedi Berik Ábdiǵalıuly «Ýáde» baǵdarlamasynda.

Eske salsaq, keshe Qazaqstan mýzeıleriniń ІІІ kongresi bastalǵanyn jazǵan edik.