Sheteldegi qazaq aqyn-jazýshylaryna arnalǵan 9 kitaptyń tusaýkeseri ótti
ASTANA. KAZINFORM — Búgin Astanada «Otandastar qory» KEAQ jáne Qazaqstan Jazýshylar odaǵy uıymdastyrǵan «Uly Dala — 2024» sheteldegi qazaq aqyn-jazýshylarynyń halyqaralyq shyǵarmashylyq baıqaýy jeńimpazdaryna arnalǵan 9 kitaptyń tusaýkeseri ótti.

Atalǵan joba aıasynda 2023 jyly 10 kitap jaryq kórgen edi.
Sharanyń maqsaty — sheteldegi etnıkalyq qazaq aqyn-jazýshylarynyń shyǵarmashylyǵyn qoldaý, olardyń eńbekterin qalyń aýdıtorııaǵa tanystyrý jáne qazaq mádenıetiniń biregeıligin saqtap, nyǵaıtý.

Sharaǵa QR Parlamenti depýtattary, qoǵam qaıratkerleri, kitap avtorlary, Qazaqstan Jazýshylar odaǵy men Otandastar qorynyń basshylyǵy qatysty.
Shara barysynda sheteldegi qazaq aqyn-jazýshylarynyń shyǵarmashylyq eńbekteri alǵash ret qazaq oqyrmandaryna usynyldy. Kitaptar qazaq ádebıetiniń baılyǵyn kórsetip, sheteldegi etnıkalyq qazaqtardyń ulttyq biregeıligin saqtaýǵa baǵyttalǵan.

2024 jyly baıqaý jeńimpazy atanyp, shyǵarylǵan kitaptar:
1. «Qobdanyń qońyr jeli» — Rysbek Zurǵanbaıuly (Mońǵolııa).
2. «Úrker aýyp barady» — Zúlkápil Máýlituly (Mońǵolııa).
3. «Tájikstandaǵy qazaqtar» — Abdýsattar Nýralıev (Tájikstan).
4. «Aqıqattyń dámi aşy» — Jarasqan Myrzamuratov (Ózbekstan).
5. «Kimdi kinálarsyń…» — Erbaqyt Núsipuly (Mońǵolııa).
6. «Urpaǵyń úzilmesin» — Muhtasyrov Pıoner Soltanovıch (Reseı).
7. «Qarasý jyrlary» — Lala Júnisqyzy Jumanova (Ózbekstan).
8. «Órikti kól» — Eleýsiz Muqamádıuly (Mońǵolııa).
9. «Aıtaǵaly salt atty» — Baman Qurmanhanuly (Mońǵolııa).

Aıta keteıik, «Uly Dala» jobasy sheteldegi qazaqtardyń mádenı jáne ádebı muralaryn zertteýdi, jınaqtaýdy, basyp shyǵarýdy jáne kópshilikke taratýdy maqsat etedi. Sheteldegi qazaqtardyń shyǵarmashylyq eńbekteri Qazaqstanda keńinen tanylyp, olardyń mádenı murasy nasıhattalady. Qazaq ádebıeti jańa shyǵarmalarmen tolyǵyp, ulttyq biregeılik nyǵaıtylady. Jas urpaq qazaqtyń mádenı jáne ádebı qundylyqtaryna tereń qyzyǵýshylyq tanytýǵa múmkindik alady.

Sharanyń uıymdastyrýshylary QR Syrtqy ister mınıstrligine qarasty «Otandastar qory» KEAQ men Qazaqstan Jazýshylar odaǵy bıyl da sheteldegi qazaqtardyń shyǵarmashylyq eńbekterin jınaqtap, nasıhattaýdy jalǵastyratynyn atap ótti. «Uly dala — 2025» halyqaralyq baıqaýyna ótinim qabyldaý bastaldy.
Osyǵan deıin jas jazýshy Baıan Tasqynuly Qytaıdyń Sanmao ádebı syılyǵynyń ıegeri atanǵanyn jazdyq.