Sheteldegi elshilikterdi ustaýǵa bıýdjetten qansha qarajat jumsalady
ASTANA. KAZINFORM — Qazaqstannyń álem elderindegi elshilikteri men dıplomatııalyq korpýsty ustaýǵa bıýdjetten jyl saıyn qansha qarjy qaralady? Kazinform Syrtqy ister mınıstrligine resmı saýal joldaǵan edi.
— Qazirgi ýaqytta Qazaqstan Respýblıkasy álemniń 80 elinde dıplomatııalyq ókildikterin ashqan, atap aıtqanda: 75 — elshilik, 7 — halyqaralyq uıymdar janyndaǵy turaqty ókildik, 28 — bas konsýldyq jáne 6 — konsýldyq mekeme bar. Óńirlik bólinis (elshilikter/konsýldyq mekemeler): Eýropa — 49%/38%, Azııa — 22%/32%, Soltústik jáne Ońtústik Amerıka — 6%/3%, Afrıka jáne Taıaý Shyǵys — 22%/27%, Tynyq muhıt aımaǵy — 1%, — dep jazylǵan jaýapta.
Quzyrly organ elshiler men dıplomatııalyq korpýstyń álemniń túkpir-túkpirinde otbasylarymen alańsyz ári qaýipsiz jaǵdaıda jumys isteýi úshin jaǵdaı jasaýǵa jyl saıyn jalpy somasy qansha aqsha jumsalatynyn aıtýdan bas tartty.
— «Aqparatqa qol jetkizý týraly» QR Zańynyń 11-baby 16-tarmaǵynyń 3-tarmaqshasyna sáıkes, eger suralǵan aqparat qoljetimdiligi shekteýli aqparatqa jatqyzylsa, ony usynýdan bas tartylady. QR Syrtqy ister mınıstriniń 2025 jylǵy 29 sáýirdegi № 11-1-4/256 buıryǵymen bekitilgen shekteýli taratylatyn qyzmettik aqparat tizbesiniń 1.21-13-tarmaqshasyna sáıkes (ortalyq apparattyń jáne sheteldik mekemelerdiń shtat kestesi, qarjylandyrý josparlary men shyǵystar lımıtteri), sondaı-aq 1.21-tarmaqshasyna sáıkes (shyǵyndar qurylymy), suralǵan málimetter shekteýli aqparat sanatyna jatady. Osyǵan baılanysty, sondaı-aq «Mass-medıa týraly» Qazaqstan Respýblıkasy Zańynyń 36-baby 2-tarmaǵynyń 3) tarmaqshasyna sáıkes, atalǵan aqparatty usyný múmkin emes, — dep jazady SІM baspasóz qyzmeti.
2025 jyldyń bıýdjetinde Syrtqy ister mınıstrliginiń jalpy shyǵyny 114 mlrd 476 mln 369 myń teńge dep kórsetilgen. Sonyń ishinde elshilikterdiń shyǵynymen qatysty bir ǵana baǵyttyń qarjysy naqty kórsetilgen. Atap aıtsaq, «Sheteldegi dıplomatııalyq ókildikterdiń arnaıy, ınjenerlik-tehnıkalyq jáne naqty qorǵalýyn qamtamasyz etý» shyǵyndaryna 241 mln 320 myń teńge bekitilgen.
Buǵan deıin Syrtqy ister mınıstri Ermek Kósherbaev Taıaý Shyǵystaǵy dıplomattar qandaı jaǵdaıda Qazaqstanǵa qaıtarylatynyn aıtqan edi.
