Sheteldegi 14 myńnan astam qazaqstandyq referendýmda daýys beredi
ASTANA. KAZINFORM — Álemniń 54 elinde ornalasqan 71 referendým ýchaskesi jumys istep tur. Bul týraly Syrtqy ister mınıstriniń orynbasary Arman Isetov «Referendým — 2026» onlaın-marafony barysynda málimdedi.
Onyń aıtýynsha, shetelde daýys berýge tirkelgen qazaqstandyqtardyń jalpy sany — 14 380 adam.
— Áskerı-saıası jaǵdaıdyń shektelýine jáne keıbir elderde azamattar sanynyń az bolýyna baılanysty on memlekettegi 11 ýchaske ashylmaıdy. Sheteldegi referendým ýchaskelerinde daýys berý Astana ýaqytymen tańǵy saǵat 03:00–de Tokıo men Seýl qalalarynda bastaldy.
Saǵat 09:00–ge deıin 34 ýchaske ashylyp, onda 350 azamat daýys berdi. Eń sońǵy ashylyp, jabylatyn referendým ýchaskesi AQSh-tyń San-Frantsısko qalasynda ornalasqan. Bul ýchaske Astana ýaqytymen búgin saǵat 19:00–de ashylyp, 16 naýryz kúni tańǵy 08:00–de jabylady, — dedi Syrtqy ister mınıstriniń orynbasary.
Sonymen qatar, Arman Isetov 14–16 naýryz aralyǵynda Astana jáne Almaty qalalarynda halyqaralyq baıqaýshy men sheteldik BAQ ókilderine qoldaý kórsetý ortalyqtary jumys isteıtinin aıtty.
— 15–16 naýryz kúnderi Ortalyq alańdarynda halyqaralyq baqylaýshylar men shet memleketterden kelgen ózge de baıqaýshylardyń qatysýymen 15 brıfıng ótkizý josparlanyp otyr, — dedi ol.
Aıta keteıik, Ulttyq olımpıada komıtetiniń prezıdenti Gennadıı Golovkın Taılandta daýys berdi.