Sheteldegi 13 referendým ýchaskesi jumysyn aıaqtady

ASTANA. KAZINFORM – Sheteldegi 13 referendým ýchaskesi jumysyn aıaqtady. Bul týraly Syrtqy ister mınıstriniń orynbasar Roman Vasılenko aıtty.

“Saǵat 19:00-degi jaǵdaı boıynsha shetelde 13 ýchaskeniń jumysy aıaqtaldy. 7 158 Qazaqstan azamaty óz daýysyn berdi. Daýys berýge 59,79 paıyzy qatysty. 60 saılaý ýchaskesi jumysyn jalǵastyrýda. Atap aıtqanda, Ortalyq Azııa, Taıaý jáne Orta Shyǵys, Eýropa, Ońtústik Amerıka jáne AQSh elderinde. Sońǵy bolyp San-Fransıkoda bir saǵattan keıin ýchaske ashylady”, - dedi mınıstr orynbasary Ortalyq referendým komıssııasynda ótken brıfıngte.

Onyń atap ótýinshe, Qazaqstannyń 54 shet eldegi mekemeleri janynan 74 ýchaskelik referendým komıssııasy qurylǵan bolatyn. Daýys beretin saılaýshylardyń jalpy sany - 12 107 adam.

“Búgin Astanada halyqaralyq baıqaýshylarǵa qolǵabys kórsetý ortalyǵynda ShYU, Túrki memleketteri uıymy jáne AÓІSShK sııaqty halyqaralyq uıymdar baıqaýshylarynyń qatysýymen birqatar brnıfıng ótti. Mıssııa basshylary atap ótkendeı, respýblıkalyq referendým Qazaqstannyń qoldanystaǵy zańnamasyna jáne halyqaralyq mindettemelerine sáıkes ótýde. Olardyń pikirinshe, referendým ashyq, erkin jáne zańdy sanalady. Olarmen ýchaskelerde birde-bir zań buzýshylyq anyqtalǵan joq. Sonymen qatar halyqaralyq baıqaýshylar bizdiń saılaýshylardyń joǵary belsendiligin erekshe atap ótti. Ózderińizge málim, referendýmda 200-den astam sheteldik jýrnalıst habar taratýda”, - dedi Roman Vasılenko.

Aıta keteıik, saǵat 18:00-degi jaǵdaı boıynsha 7 537 675 azamat bıýlleten aldy. Bul tizimge engizilgen azamattardyń 61,56 paıyzyn quraıdy.